Nagkaloob ng pagsasanay sa massage therapy at bread making ang tanggapan ng Presidential Commission for the Urban Poor (PCUP) sa mga residente ng barangay Alangilan bilang bahagi ng kanilang Capability Program, September 19.

Naging katuwang ng PCUP sa pagtataguyod ng naturang proyekto ang tanggapan ni Councilor Andrea Macaraig at ang Soroptimist International Batangas Inter-city kung saan siya ang tumatayong Pangulo gayundin ang TESDA na siyang nagbigay ng training.

Ayon kay Macaraig, hangad nilang mabigyan ng kasanayan upang pagkakitaan lalot higit ang mga ina ng tahanan.

Natutuwa aniya siya na makitang interesadong matuto ang mga participants.

Nagpapasalamat din siya sa suporta nina Mayor Beverley Dimacuha at Congressman Marvey Mariño upang maisakatuparan ang nasabing proyekto.

Ayon naman kay PCUP Field Operations Division for Luzon Commissioner na si Atty. Andre Niccolo Tayag, ang isinagawang pagsasanay ay umpisa pa lamang ng pagtutuwang PCUP at lokal na pamahalaan para sa mga proyektong pangkabuhayan.

Hiniling nila na maibahagi ng mga nagsanay ang kanilang mga natutunan sa kanilang mga kapamilya at kaibigan para magkaroon din ang mga ito ng pagkakataong kumita.

Tumanggap ng certificate ang mga participants na maaari nilang gamitin upang maipagpatuloy ang libreng training sa TESDA.

Magsasagawa ng monitoring ang PCUP sa mga nagsanay upang magabayan ang sa pagsisimula ng kanilang negosyo at nakahanda ring silang tumulong na mailapit sa funding agencies ang mga ito sakaling mangangailangan ng puhunan. (PIO Batangas City)