Police outpost sa Isla Verde itinalaga

Details

Tuesday, 06 February 2018 - 5:09:45 PM

Naglagay ng police outpost ang Batangas City PNP sa Isla Verde para sa seguridad ng anim na barangay dito at upang maging mas mabilis ang pagresponde sa anumang peace and order problem.

Ayon kay Batangas City PNP Chief PSupt Wildemar Tiu, ang tatlong pulis na itinalaga dito ay magpapatrolya sa mga barangay ng Isla Verde at magru ruta din sa mga paaralan. “Maganda na may nakikitang mga pulis ang mga residente dito, partikular ay ang mga kabataan para maiwasan silang gumawa ng di maganda,” sabi ni Tiu.

Idinagdag pa niya na layunin ng city PNP na palakasin at pagtibayin ang mga programa nila at maiparating sa Isla Verde ang lahat ng proyektong ipinatutupad ng kapulisan sa bayan. “Sila ang extension ng himpilan ng pulisya sa bayan, kaya’t sana ay maipaalam nyo sa kanila lahat ng inyong concerns,” ayon pa rin sa hepe.

Aniya, nakipag ugnayan na rin sila sa mga non- government organizations para sa mga tulong na posibleng maibigay ng mga ito, tulad ng tubig at iba pa.

Nakikipag ugnayan na rin siya sa mga brgy. chairmen ng Isla Verde para sa maaring pagtayuan ng Police Community Precint, gayun din sa City Disaster Risk Reduction and Management Council (CDRMMC) para sa pagbibigay kaalaman ukol sa natural at human disasters.

Ayon kay hepe, dapat mapaghandaan na ngayon ang seguridad sa Isla Verde dahil sa malaking potensyal nito sa turismo na magbibigay ng mga hanapbuhay, kung kaya’t darami naman ang tao dito.

Ang mga itinalagang pulis sa Isla Verde ay inihatid ni hepe kasama ang ilang opisyal at miyembro ng city PNP, Coun. Oliver Macatangay, member ng Committee on Peace and Order and Public Safety ng Sangguniang Panlungsod, at CDRRMO head Rod Dela Roca. Hiniling ng hepe ang ang kooperasyon at suporta ng mga mamamayan sa mga itinalagang pulis. Sila ay tinangggap ng mga residente ng anim na barangay sa pangunguna ng mga pangulo dito. (PIO Batangas City)

• < Prev
• Next >