Rehabilitasyon ng Manila to Batangas Road sa barangay Balagtas, muling tinalakay sa SP

Details

Tuesday, 10 August 2021 - 4:23:45 PM

Muling inimbitahan ng Sangguniang Panlungsod ang Department of Public Works and Highways (DPWH) District II at Jasmig Construction Corporation sa committee hearing upang humingi ng update hinggil sa ginagawang rehabilitasyon ng Manila to Batangas Road sa Barangay Balagtas, August 10, Isa sa tinalakay sa nasabing hearing ay ang posibleng pagpapaikli ng completion date ng proyekto. Magugunita na sinabi ni Engr. Ronald Frago ng DPWH noong nakaraang committee hearing na aabutin ang proyekto ng 274 days o humigit kumulang sa 9 na buwan.

Ayon kay Coun. Gerry Dela Roca, chairman ng Committee on Engineering, masyadong matagal ito kung kayat maraming stakeholders ng lungsod ang dumadaing dahil sa nade-delay ang deliveries ng kanilang mga produkto. “Ilan sa mga myembro ng konseho ay may kaalaman sa construction project kaya naman sa tingin namin e makakaya itong tapusin sa loob ng 4 na buwan,” sabi ni Dela Roca.

Ipinaliwanag naman ni Engr. Frago na ang malimit na pag-ulan noong nakaraang linggo ay isa sa mga dahilan kung bakit naantala ng bahagya ang proyekto. “Bukod sa ulan, yung mga poste ng Telcos na mahahagip ng road construction ay dahilan din kung bakit hindi agad masagad ang trabaho,” ayon kay Frago.

Idinagdag pa niya na bagamat may mga unforeseen circumstances, ‘nasa halos 51% nang tapos ang proyekto at inaasahan nila na matatapos ito ng mas maaga kumpara sa naunang nabanggit na completion date. Kinwestyon naman ni kagawad Nestor Boy Dimacuha ang tila kakulangan ng mga equipment ng contractor.

Dalawang backhoe lamang aniya ang nakikita niya at tila nabawasan pa nang huli siyang mapadaan sa site. “ Hindi namin kayo ipinatawag upang sisihin, nais lamang namin na makabuo ng strategies para maibsan ang trapiko at makaisip ng pamamaraan upang mabilis na matapos ang proyektong ito,” sabi ni Dimacuha.

Sinabi naman ni Eng. Romy Garcia, Operations Manager ng Jasmig na ibinalik lamang sa staging area ang isang backhoe at umasa aniya sila na ibabalik na sa site ngayong hindi na umuulan. Nagsimula ang konstruksyon ng Manila to Batangas Road noong June 21. Ang mga barangay na sakop nito ay Balagtas, Alangilan, at Kumintang Ilaya. (PIO Batangas City)

• < Prev
• Next >