Isang kabuhayan mula sa bunot itinataguyod ng OCVAS

Details

Tuesday, 22 May 2018 - 5:08:43 PM

Isang bagong livelihood project ang isinusulong ngayon ng Office of the City Veterinary and Agricultural Services (OCVAS) - ito ay ang coco coir twining and weaving na ang produkto ay coconet mula sa bunot at ginagamit bilang proteksyon sa soil erosion.

Isang seminar tungkol dito ang isinagawa ng OCVAS noong May 15-18 kung saan lumahok ang may 30 residente buhat sa pitong barangay na pinagkalooban ng makinaryang panggiling ng Department of Agriculture. Ang mga barangay na ito ay ang Talumpok Kanluran, Banaba South, Pinamucan Ibaba, Maruclap, Talahib Payapa, Talahib Pandayan, at Sto. Nino kung saan maraming tanim na puno ng niyog na pinagkukunan ng bunot na siyang ginagamit sa paghabi.

Naging resource speaker/trainor ng seminar si Ben Garlito mula sa Villar Foundation.

Ayon kay Garlito, ang coco coir weaving ay magandang pagkakitaan dahil bukod sa maraming mga bunot sa bundok na hindi na bibilhin pa, ay may sigurado ring merkado ang produkto. Aniya, ang coconet ay ginagamit ng DPWH at pribadong contractor na panlatag sa mga sloping surfaces bilang proteksyon sa pagguho ng lupa sa kanilang mga ginagawang proyekto. Ginagamit din ito sa mga landscaping, hanging plant box, door mat at sa iba pang beautification projects.

Nakahanda ang OCVAS na suportahan ang mga magpapatuloy sa proyektong ito, kung saan ipagagamit ng libre ang kanilang twining at weaving machines. (PIO Batangas City)

• < Prev
• Next >