Dental Division ng CHO best performer sa region

Details

Friday, 24 November 2017 - 12:01:34 PM

BATANGAS CITY Tinanghal na Best Performer in Innovative Programs and Best Practices ang Dental Division ng City Health Office (CHO) sa Region IV-A sa kauna-unahang Oral Health Summit ng Department of Health (DOH). Ang awarding ay ginanap noong November 16 sa Heritage Hotel kung saan ipinagkaloob ng DOH Region IV ang plake at cash prize na P100,000 sa staff ng Dental Division sa pangunguna ni Dr. Lovely Cabral. Ang tema ng Oral Health Summit ay “Bridging the Gap and Building Healthy Communities Together.”

Ayon kay Dr Cabral, naging winning points nila ang mga innovations nila sa kanilang mga programa na wala sa ibang LGUs . Isa rito ay ang Buntis Card na sinimulan noong taong 2015 kung saan ang mga nagdadalantao na makakapagpa check up ng tatlong beses sa dentist sa panahon ng kanilang pagbubuntis ay binibigyan ng nasabing card upang maka avail ng libreng oral prophylaxis.

Sa pamamagitan ng proyektong Batang Ala Eh-Batang OK, sinisimulan sa mga daycare students ang pagtuturo ng oral health sa pamamagitan ng pagkakaroon ng toothbrushing drill sa mga bata. Ginagamit dito ang mga spit tray facilities na ipinagkakaloob ng CHO sa mga daycare centers. Binibigyan din ang mga bata ng libreng toothbrush at tooth paste.

Namimigay din sila ng mga oral health packages sa mga matatanda at diabetic patients. Malaking puntos din aniya ang ipinagkaloob sa kanilang pagbisita sa mga far flung barangays tulad ng Isla Verde kung saan iba’t ibang dental services ang ipinagkakaloob nila.

Ipinagmamalaki ng Dental Division ang kanilang makabagong kagamitan kung saan humigit kumulang sa 100 pasyente ang kanilang naseserbisyuhan sa isang araw. Lubos ang pasasalamat nila sa suportang ipinagkakaloob ni Mayor Beverley Rose Dimacuha upang maisagawa nila ang kanilang mga programa.

Ayon pa rin kay Dr. Cabral, siyam sa bawat 10 mamamayan ng Batangas City ang may sirang ngipin. Kailangan aniyang bigyan din nila ng prayoridad ang kanilang mga ngipin at iba pang aspeto ng oral health sapagkat ang problema dito ay pwedeng humantong sa iba’t ibang sakit. (PIO Batangas City)

• < Prev
• Next >