May 65,000 elementary at highschool students sa pampublikong paaralan sa lungsod ang nakatakdang magbalik eskwela sa pagbubukas ng klase sa August 29.
Ayon kay Batangas City Schools Superintendent Dr. Hermogenes Panganiban, inihanda na ng Schools Division Office (SDO) ang lahat ng paaralan sa lungsod sa pagbubukas ng klase para sa taong panuruan 2023-2024.

Sumailalim sa pagsasanay ang mga guro upang matiyak ang kahandaan ng mga ito.

Ang early registration ay isinagawa noong May 10 hanggang June 9 at tatanggapin pa rin ang mga mag-eenrol hanggang August 26.

Ipatutupad aniya ang full 5-day face to face classes habang ang mga pribadong paaralan naman ay maaaring magpatupad pa din ng blended learning.
Sinabi rin niya na hindi required na magsuot ng school uniform ang mga mag-aaral subalit hinihikayat nila para sa identification.

Idinagdag pa niya na nakatakdang isagawa ang Brigada Eskwela sa August 14-19 at nagpaabot ng pasasalamat sa mga magulang, stake holders at sa pamahalaang lungsod.

Saludo aniya siya sa tulong at suportang ipinagkakaloob ni Mayor Beverley Dimacuha sa SDO.

Binanggit din ni Dr Panganiban na on-going pa din ang National Learning Camp ng Dep Ed na nagsimula noong July 24 at matatapos sa August 25.
Ito aniya ay enhancement, consolidation at intervention camp na boluntaryong nilahukan ng mga guro at mag-aaral.

Pinaalalahanan pa rin niya ang lahat na maging maingat sa kabila ng pagtatanggal ng state of public health emergency sa bansa. (PIO Batangas City)