Lahing Batangan nagtanghal sa International Dance Xchange

Details

Wednesday, 02 May 2018 - 5:00:34 PM

DUMAGUETE CITY – Lumahok ang Batangas City, ang itinuturing na cultural center ng Calabarzon, sa International Dance Xchange Workshop and Performances sa Dumaguete City noong April 26 – 30 kung saan nagtanghal ang Lahing Batangan. May temang “Cultural connectivity through Dance”, ito ay proyekto ng National Commission for Cullture and the Arts na naglalayong mabigyan ng kaalaman ang mga Filipino sa kultura at sayaw ng ibang bansa. Layunin din nito na maabot ang kasuluk sulukang mga barangay upang maihatid ang iba’t ibang kultura sa pamamagitan ng mga sayaw.

May 852 participants mula sa buong Pilipinas ang lumahok sa dance workshop. Mahigit 10 international groups ang nagbigay ng lecture at demonstration ng kanilang native dances mula Thailand, Malaysia, Indonesia, Turkey, Poland, Japan, China, Bangladesh, Hongkong, India at Hawaii.

Nagtanghal din ang mga foreign groups kasama ang mga local performers tuwing gabi sa ilang concerts na ginanap sa iba’t ibang venues. Ilan dito ang ipinagmamalaking Lahing Batangan ng Batangas City, Next to Innocence, J Crisis, Melengas Dance Company ng Pagadian, Zamboanga Group, Kislap Sining at ang Cebu Dancesport Team. Ang mga grupong ito ay nagsasagawa rin ng mga outreach shows sa mga maliliit at malalayong mga barangay.

Isa sa mga mga lecturers si Bb. Ligaya Fernando- Amilbangsa, isang Ramon Magsaysay awardee at dalubhasa sa sayaw na “pangalay”, isang katutubong sayaw sa Mindanao. Dito’y inihalintulad niya ang sayaw na subli ng Batangas sa pangalay ng Mindanao kung saan itoy isang sagradong sayaw, sinasayaw ng may paggalang at kahit mabilis ang tugtog ay sinasayaw ng mabagal.

Dumalo sa nasabing workshop ang ilang mga miyembro ng Batangas City Cultural Affairs Committee na sina Alvin M. Remo, Erick Anthony Sanohan at Peter John Caringal.

Ang utak ng International Dance Exchange ay ang chairperson ng National Committee on Dance na si Bb. Shirley Halili-Cruz sa pakikipagtulungan ng vice chairperson na si Larry Gabao, Rodel Fronda bilang kalihim at Franco Velas bilang pangalawang kalihim. (PIO Batangas City)

• < Prev
• Next >