2,771 kandidato sa barangay at SK elections naghain ng COC

Details

Wednesday, 02 May 2018 - 4:51:47 PM

Sa 1,680 posisyon na paglalabanan ng mga kandidato sa Barangay at Sangguniang Kabataan (SK) elections sa Batangas City sa darating na May 14, 2,771 ang kabuuang bilang ng nakapaghain ng kanilang certificates of candidacy (COC).

Sa 105 barangay sa lungsod, may 209 ang naghain ng kandidatura bilang punong barangay at 1,517 naman bilang mga barangay kagawad.

May 199 kabataan ang naghain ng COC bilang SK chairmen habang 846 naman para sa SK kagawad. May 27 barangay ang mayroong isang kandidato lamang para sa pagka- Barangay Chairman habang 34 naman ang mga barangay na may iisang kandidato para sa SK chairman.

Walang kandidato sa SK chairman ang Barangay 16 habang wala namang kandidato para sa SK kagawad ang barangay Poblacion 5, 7, 16, Mahacot Silangan at San Miguel.

Sa kabuuan ay naging maayos ang sistema ng filing ng COC noong April 16-20 ayon kay Batangas City Comelec Officer Grollen Mar Liwag dahilan sa pagpapatupad nila ng queing o pagpila ng mga kandidato.

Magkakaroon ng paglagda sa peace covenant ang mga kandidato sa lungsod sa May 8 sa pangunguna ng Batangas City PNP. Sa May 4-12 ang campaign period habang sa May 9-10 naman isasagawa ang orientation para sa electoral board at board of canvassers (BOC). Ang halalan ay gaganapin mula alas otso hanggang alas singko ng hapon sa May 14. (PIO Batangas City)

• < Prev
• Next >