Bagong samahan ng LGBT binuo

Details

Monday, 04 December 2017 - 4:21:19 PM

Isang bagong samahan ng mga nabibilang sa lesbian, gay, bisexual, transgender (LGBT) group sa Batangas City ang binuo upang mapangalagaan ang kapakanan ng mga ito at mabigyan ng proteksyon laban sa dumadaming kaso ng HIV/AIDS sa Batangas Province.

Ito ay ang Lesbian Gay Bisexual Transgender Queer, Intersexual, Asexual (LGBTQIA) Batangas City Chapter na nasa ilalim ng Samahan ng Ikatlong Lahi ng Batangas Inc (SILBI) na nagsimula noong Hulyo 2015.

Ayon sa pangulo nito na si Raul “Ariane” Gamboa, isang sikat na local hairstylist, make- up artist at fashion designer, pagtutuunan niya ng pansin ang pagbibigay ng proteksyon hindi lamang sa karapatan ng kanilang mahigit sa 400 myembro kundi sa pangangalaga sa kapakanan ng mga ito sa kanilang propesyon, career o hanapbuhay.

Magiging prayoridad din nila ang kalusugan ng kanilang myembro partikular sa prevention ng sexually transmitted diseases kagaya ng HIV/AIDS. Ang iba pang opisyales ng samahan ay sina Maxwell Cello bilang vice-president, Jane Marasigan at Ray-an Buenviaje bilang secretary at asst. secretary, Dr Melvin Torino at Aiko Dieza na nahalal bilang treasurer at asst. treasurer, PROs na sina Leo Puri, Gab Garcia at Rodrigo Justiniano at si PESO Manager Noel Silang, auditor.

Pumili din sila ng sampung Board of Directors na makakatulong nila sa operasyon ng kanilang grupo.

Ang mga newly elected officers na ito ay nanumpa sa kanilang tungkulin sa harap ni Mayor Beverley Dimacuha ngayong December 4.

Hiningi nila ang suporta ng Mayor sa mga ilulunsad nilang proyekto at programa upang magkaisa ang lahat ng mga ikatlong lahi sa lungsod. Nanawagan din si Gamboa sa mga myembro na tumulong upang maging matagumpay ang kanilang mga adhikain at hinikayat naman ang iba pang mga LGBT na lumahok sa kanilang grupo. (PIO Batangas City)

• < Prev
• Next >