Batangas City BFP, wagi bilang Best City Fire Station sa rehiyon

Details

Friday, 27 August 2021 - 4:19:02 PM

Tinanghal na Best City Fire Station of CY 2021 ang Batangas City Fire Station sa CALABARZON Region sa isinagawang virtual awarding ceremony ngayong araw, August 27 kaalinsabay ng pagdiriwang ng ika-30 taong anibersaryo ng Bureau of Fire Protection (BFP).

Nakuha ng BFP Batangas City ang pinakamataas na rating sa nasabing search kung saan ang ginamit na criteria sa pagpili ng magwawagi ay ang implementation ng fire protection programs, overall appearance of the office at personnel preparedness sa ilalim ng revised BFP Programs on Awards and Incentives for Service Excellence (BFP-PRAISE).

Highlight ng nasabing pagdiriwang ang paggagawad ng parangal sa mga Local Chief Executive sa CALABARZON bilang pasasalamat sa suporta na ipinagkakaloob ng mga ito na isa sa mga dahilan upang makapagbigay ng de-kalidad na serbisyo ang mga myembro ng BFP. Kaugnay nito, ginawaran ng plaque of recognition si Mayor Beverley A. Dimacuha dahil sa patuloy nasuporta at tulong nito sa BFP Batangas City partikular sa pagkakaloob ng pondo para sa pagpapatupad ng Fire Prevention Month activities para sa taong 2020 hanggang 2021.

Ilan pa din sa mga proyekto na naisagawa ng BFP Batangas City sa tulong ng lokal na pamahalaan ay ang repair ng poblacion Fire Sub-station, repair at maintenance ng mga fire trucks gayundin ang gas allocation ng mga ito, pagkakaloob ng medical supplies tulad ng personal protective equipment (PPE), medicines and disinfectants kontra COVID-19, request para sa water tender fire truck at paglagda sa Memorandum of Agreement (MOA) sa pagpapaigting ng implementasyon ng fire enforcement laws.

Tinanggap ni Executive Assistant Serge Atienza na syang kinatawan ni Mayor Dimacuha ang plake mula sa hepe ng Batangas City BFP nasi FCINSP Jeffrey Atienza. Binigyan din ng special awards ang mga private individuals at groups gayundin ang mga volunteer fire brigades.

Nagsilbing guest of honor at speaker sa naturang okasyon si Senator Ronald “Bato” Dela Rosa na nagpaabot ng pagbati sa mga men in uniform ng BFP sa mahusay na pagganap sa tungkulin ng mga BFP personnel sa gitna ng pandemya at sa pagbibigay ng quality service in line with the BFP's mission.

Tema ng 30th BFP Anniversary ay “Salamin ng Nakaraan, Larawan ng Kinabukasan”.(PIO Batangas City)

• < Prev
• Next >