TINGNI: May 91 pamilya ang nakatanggap ng bigas kapalit ng kanilang mga naipong recyclable materials sa isinagawang “Trash to Bigas” program sa barangay Santa Clara noong Agosto 11.

Bahagi ito ng patuloy na inisyatiba ng pamahalaang lungsod, sa pangunguna ng Office of the City Environment and Natural Resources Office (OCENRO), upang mapalakas ang kamalayan ng mga residente sa tamang paghihiwalay at pagre-recycle ng basura.

Sa isinagawang collection, nakalikom ng 70.8 kilo ng papel, 890.35 kilo ng plastik, 114.3 kilo ng bubog, at 348.8 kilo ng metal.

Nakolekta rin ang 1,293 piraso ng gin bilog at kwatro bottles, gayundin ang anim na piraso ng automotive battery na nakalaan para sa wastong disposal.

Pinakamalaki ang naging rice exchange ni Christy Marie Bañago, na nakapagpalit ng kaniyang mga recyclable materials para sa 91.9 kilo ng bigas.

Sa kabuuan, 1,024.11 kilo ng bigas o 40 sako at karagdagang 24.11 kilo ang naipamahagi sa mga residenteng lumahok.

Layunin ng naturang programa na mabawasan ang basurang napupunta sa tambakan at mahikayat ang bawat pamilya na maging bahagi ng mga hakbang tungo sa mas maayos na pangangalaga sa kapaligiran. (PIO Batangas City)