TINGNI: Bilang pakikiisa ng pamahalaang lungsod ng Batangas sa pagdiriwang ng World Environment Day, nagsagawa ang Office of the City Environment and Natural Resources Officer (OCENRO) ng “Plogging for the Environment” noong Hunyo 5.

Ang plogging ay pinagsamang jogging o pagtakbo at ang salitang Swedish na plocka upp na nangangahulugang “pulutin”. Isa itong aktibidad kung saan ang mga kalahok ay nagpupulot ng basura habang naglalakad o tumatakbo.

Isa din itong masaya at epektibong paraan ng pag-eehersisyo habang direktang nakatutulong sa pangangalaga ng kalikasan.

Layunin din nitong makatulong sa paglaban sa polusyon, partikular na sa suliranin ng plastic waste.

Hangad ng aktibidad na itaguyod ang pangangalaga sa kapaligiran, mapalawak ang kamalayan ng mamamayan tungkol sa kahalagahan ng malinis na kapaligiran, at magsilbing konkretong hakbang tungo sa mas malusog at mas ligtas na komunidad.

Nilahukan ang plogging ng mga residente mula sa iba't ibang barangay at mga samahan sa lungsod. Sa kanilang pakikibahagi, ipinakita nila ang mahalagang papel ng bawat isa sa pagpapalaganap ng disiplina, kaalaman, at wastong gawain para sa pangangalaga ng kalikasan.

Ayon kay City Environment Officer Oliver Gonzales, maraming paraan upang makiisa sa pagdiriwang ng World Environment Day, tulad ng pagtatanim ng mga puno at halaman, paglilinis ng kapaligiran, wastong pagtatapon ng basura, at pagtitipid sa paggamit ng kuryente at tubig.

Patuloy ding isinusulong ng OCENRO ang iba't ibang programang pangkalikasan at mga proyektong magbibigay ng benepisyo sa kasalukuyan at sa mga susunod na henerasyon.

Kabilang dito ang paghikayat sa mga residente na magsagawa ng tamang paghihiwalay o segregasyon ng basura sa kani-kanilang mga tahanan. (PIO Batangas City)