TINGNI: Tumanggap ng insentibo ang 12 kawani ng pamahalaang lungsod mula sa iba’t ibang tanggapan bilang pagkilala sa kanilang aktibong pakikilahok sa Walk-to-Work at Bike-to-Work Program.

Siyam na empleyado ang nabigyan ng insentibo sa ilalim ng Walk-to-Work Program.

Ang mga naglalakad ng layong 1 hanggang 2 kilometro ay tumanggap ng ₱500, habang ang mga naglalakad ng layong 2 hanggang 3 kilometro ay nakatanggap ng ₱1,000.

Dalawang empleyado naman ang tumanggap ng insentibo sa ilalim ng Bike-to-Work Program.

Nakatanggap ng ₱500 ang mga nagbibisikleta ng layong 1 hanggang 2 kilometro, habang ₱1,500 naman ang ibinigay sa mga nagbibisikleta ng layong 3 hanggang 4 na kilometro.

Samantala, isang empleyado ang nakatanggap ng ₱1,000 matapos pagsamahin ang paglalakad at pagbibisikleta sa pagpasok sa trabaho sa layong 2 hanggang 3 kilometro.

Ang Walk-to-Work at Bike-to-Work Program ay bahagi ng patuloy na pagsisikap ng lokal na pamahalaan na hikayatin ang mga empleyado na magkaroon ng mas malusog na pamumuhay.

Layunin din ng programa na mabawasan ang paggamit ng mga sasakyang gumagamit ng gasolina at makatulong sa pangangalaga ng kalikasan.

Sa pamamagitan ng pagbibigay ng mga insentibo, inaasahan ng pamahalaang lungsod na mas marami pang empleyado ang mahihikayat na makilahok sa programang ito. (PIO Batangas City)