TINGNI: Lubos na ipinagmamalaki ng Batangas City ang tagumpay ni Anne Carres De Mesa matapos tanghalin bilang Miss Tourism Worldwide 2026 sa ginanap na pageant noong Abril 25 sa Malaysia.

Bilang kinatawan ng Pilipinas, matagumpay na naiuwi ni De Mesa, na tubong Batangas City, ang korona, habang ipinamalas ang kagandahan, kultura, at kakayahan sa pandaigdigang entablado.

Sa isang panayam, ibinahagi niya ang hangaring higit pang maipakilala ang Batangas City at lalawigan ng Batangas sa mas maraming tao. Ayon pa sa kanya, labis ang kanyang kasiyahan na maiuwi ang korona para sa lungsod at magsilbing inspirasyon sa kapwa Batangueño.

Sinabi rin ni De Mesa na nais niyang maging katuwang sa pagsusulong ng turismo, pagpapahalaga sa kultura, at pagpapakilala ng iba’t ibang lokal na pamana ng Batangas sa mas malawak na komunidad. Nagpaabot din siya ng pasasalamat sa patuloy na suporta ng lungsod at ng mga Batangueño.

Bilang pagkilala sa kanyang natatanging tagumpay pormal siyang binigyan ng parangal ng Sangguniang Panlungsod sa pagbibigay ng pride and honor hindi lamang sa lungsod kundi maging sa buong bansa.

Ang tagumpay na ito ay sumasalamin sa husay at determinasyon ng mga Batangueño na maipakita ang kanilang kakayahan at makilala sa mas malawak na larangan. (PIO Batangas City)