TINGNI: Buong taong ipinatutupad ng Pamahalaang Lungsod ng Batangas, sa pamamagitan ng Office of the City Veterinarian, ang Anti-Rabies Prevention and Control Program upang mapanatiling ligtas ang komunidad laban sa rabies.

Ayon kay OIC City Veterinarian Dr. Sheila Lualhati, sa direktiba ni Mayor Marvey Mariño ay tuloy-tuloy ang libreng pagbabakuna laban sa rabies para sa mga alagang aso at pusa — kapwa sa kanilang tanggapan at sa iba’t ibang barangay. Kasabay nito ang information dissemination campaign at pamamahagi ng mga babasahin hinggil sa rabies at responsableng pag-aalaga ng hayop, tulad ng pagtali o pagpapanatili ng mga alaga sa loob ng bakuran.

Batay sa tala ng City Veterinary Office, umabot na sa 19,310 aso ang nabakunahan mula sa tinatayang 27,946 na populasyon ng aso sa lungsod. Samantala, 3,577 pusa naman ang nabakunahan mula sa humigit-kumulang 6,285 na bilang noong 2025.

Bilang karagdagang hakbang, nagsasagawa rin ang tanggapan ng libreng pagkakapon isang beses kada linggo upang makontrol ang pagdami ng mga asong gala (aspin) at pusang gala (puspin), na maaaring magdulot ng panganib sa kalusugan ng publiko.

Para sa mga nagnanais magpabakuna o magpakapon ng kanilang mga alagang hayop, maaaring makipag-ugnayan sa Office of the City Veterinarian sa numerong (043) 723-8432. (PIO Batangas City)