TINGNI: Pinalalakas ng City Operations Office ng Pantawid Pamilyang Pilipino Program (4Ps) sa ilalim ng Department of Social Welfare and Development (DSWD) ang ugnayan sa mga lokal na pamahalaan na katuwang sa implementasyon ng kanilang mga programa sa pamamagitan ng collaborative discussions at initial planning session sa ginanap na First Quarter 2026 Stakeholders’ Meeting noong Pebrero 23.

Layunin ng aktibidad na higit na mapalalim ang pag-unawa ng mga stakeholder sa Republic Act No. 11310 o 4Ps Law, oryentasyon hinggil sa First 1,000 Days (F1KD) bilang isa sa mga pangunahing kondisyon nito, at pagpapakilala sa mga form ng DSWD 4Ps Compliance Verification System (CVS) na ginagamit sa pagmomonitor ng pagtugon ng mga benepisyaryo sa mga kondisyong pangkalusugan.

Ibinahagi sa mga kalahok ang pinakabagong datos ukol sa serbisyong pangkalusugan: mayroong 8,232 aktibong 4Ps household grantees sa lungsod (7,481 babae at 751 lalaki), 87 health centers, at 1,075 benepisyaryo ang kasalukuyang mino-monitor sa aspeto ng kalusugan, kung saan 30 ang mino-monitor sa labas ng Lungsod ng Batangas.

Mayroon ding 47 buntis na benepisyaryo na rehistradong mino-monitor at 206 na saklaw ng First 1,000 Days (F1KD).

Nagkaroon din ng open forum para sa mga katanungan, paglilinaw, at rekomendasyon tungo sa mas maayos at epektibong pagpapatupad ng 4Ps sa lungsod.

Ang naturang okasyon na itinaguyod katuwang ang pamahalaang lungsod ay dinaluhan ng mga midwife at nurses ng City Health Office (CHO), social welfare assistants, DSWD 4Ps City Links, gayundin ng Cluster Compliance Verification Officer mula sa 4Ps Provincial Operations Office na si Vilmar Manalo. (PIO Batangas City)