TINGNI: Pinalawig ng pamahalaang lungsod ang deadline ng renewal ng business permits mula Enero 31 hanggang Pebrero 16, 2026.

Ito ay alinsunod sa ordinansang “An Ordinance Extending the Renewal Period of Business Permits, Licenses and Payment of Corresponding Fees and Taxes in the City Government of Batangas from 31 January 2026 to 16 February 2026 without Surcharges or Penalty” na ipinasa ng mga miyembro ng Sangguniang Panglungsod sa isang special session, bilang tugon sa kahilingan ni Mayor Marvey Mariño.

Ayon kay Councilor Claudette Ambida, Chairman ng Committee on Ways and Means, layunin ng naturang hakbang na mabigyan ng sapat na panahon ang mga negosyante upang makapag-renew ng kanilang business permits.

Binigyang-diin niya na malaki ang bilang ng mga umiiral na negosyo at ng mga nagnanais magtayo ng bagong negosyo sa Batangas City, kaya’t kinakailangan ang extension.

Sa ilalim ng pinalawig na panahon ng renewal, hindi kakaharapin ng mga negosyante ang anumang penalties o surcharges.

Ang mga hindi makakapag-renew sa loob ng itinakdang panahon ay papatawan ng 25% surcharge at 2% interest kada buwan sa business tax kung kaya't patunay ang nasabing extension ng pagtalima ng pamahalaang lungsod sa Ease of Doing Business Act.

Magugunita na nagsimula ang application at renewal ng business permits sa pamamagitan ng Integrated Business One-Stop Shop (BOSS) sa Bay City Mall noong Enero 5. (PIO Batangas City)