TINGNI: Inabot lamang ng 20 minuto ang transaksyon ng unang kliyente ng Integrated Business One-Stop-Shop (BOSS) ng pamahalaang lungsod ng Batangas nang mag-renew ito ng kanyang business permit noong January 5.

Ang unang kliyente ay si Cris Cometa ng barangay Mahabang Parang, isang LPG retailer.

Natapos naman sa loob ng sampung minuto ang pagproseso ng aplikasyon para sa bagong business permit ng real estate leasing business ni Danny Esguerra ng barangay Gulod Labac.

Sila ay dalawa lamang sa mahigit 200 indibidwal na kabuuang bilang ng mga naisyuhan ng business permit sa unang araw ng pagkuha at pagre-renew.

Tumatanggap din ang Integrated BOSS ng online application at payment sa pamamagitan ng website na business.batangascity.gov.ph.

Matatagpuan ang Integrated BOSS sa ikaapat na palapag ng Bay Citimall.

Mayroon din itong eBOSS kiosk na layong mapabilis ang pagproseso ng mga dokumento hindi lamang para sa business permit kundi pati na rin sa pagbabayad ng occupational tax, real property tax, at professional tax receipt.

Ang nasabing hakbang ay alinsunod sa zero contact policy sa ilalim ng Ease of Doing Business Law at Anti-Red Tape Act (ARTA).

Layunin din nitong mabigyan ng kaginhawaan ang mga kliyenteng walang internet connection, habang ang online system ay maaari namang gamitin kahit saan mang lugar.

May ipinatutupad na iskedyul ang Integrated BOSS sa pagrerehistro at pagre-renew ng business permit sa buong buwan ng Enero na magsisimula alas-7:00 ng umaga.

Mula January 5 hanggang 9 ay para sa mga barangay sa Solid North; sa January 12-15, at 19 naman ang mga barangay sa Solid Poblacion; January 20-23 at 26 para sa mga barangay sa Solid East at Market 1, 2 at 3; at sa January 27 hanggang 30 ang mga barangay sa Solid Upland at Solid Baybay.

Para sa iba pang katanungan, maaaring makipag-ugnayan sa Business Permits and Licensing Office (BPLO) sa mga numerong (043) 403-3447 o (043) 722-2252, o mag-email sa This email address is being protected from spambots. You need JavaScript enabled to view it. . (PIO Batangas City)