TINGNI: Opisyal nang sinimulan ng pamahalaang lungsod ng Batangas ang pagdiriwang ng Kapaskuhan sa Christmas Kick-Off activity sa Plaza Mabini, November 28.

Sa temang "Masaya ang Sama-sama, Tuloy-tuloy na Pag-unlad", pinangunahan nina Mayor Marvey Mariño at Congresswoman Beverley Dimacuha ang sabayang pagpapailaw ng mga dekorasyong pamasko sa Plaza Mabini at sa harapan ng City Hall.

Kasabay nito, sabay-sabay ding nagliwanag ang mga Christmas decorations sa Batangas City Coliseum, Convention Center, luma at bagong pamilihan, kahabaan ng P. Burgos at Rizal Avenue, at maging sa EBD Bridge of Progress, Bridge of Promise, at Calumpang Bridge.

Nagbigay-saya ang mga pagtatanghal nina JV at Genesis, Ventriloquist Puppeteer, at No Bone Kids Happy Acrobats.

Namahagi rin ang lokal na pamahalaan ng regalo sa may 500 bata ng Early Childhood Care and Development (ECCD) at libreng snacks sa 700 katao.

Nakiisa sa okasyon ang mga miyembro ng Sangguniang Panlungsod sa pangunguna ni Vice Mayor Alyssa Cruz, gayundin ang mga Department Heads ng pamahalaang lungsod.

Mananatili ang mga dekorasyong pamasko hanggang sa kapistahan ng Mahal na Patrong Sto. Niño sa January 16. (PIO Batangas City)