TINGNI: Ipatutupad na sa lungsod ang Barangay Skilled Workers Registry!

Ito ay matapos aprubahan ng Sangguniang Panglungsod ang isang ordinansang nagtatakda ng sistematiko at regular na registration, updating, at coordination—mula barangay hanggang city level.

Ayon kay Konsehal Zester Hernandez na may akda ng naturang ordinansa, ito ang kauna-unahang local policy sa bansa na nagtatatag ng isang organisado at structured na Barangay Skilled Worker Registry (BSWR).

Inaatasan nito ang bawat barangay na bumuo ng BSWR upang mangalap, kilalanin, at itala ang mga skilled at unskilled workers sa kanilang nasasakupan.

Kabilang sa impormasyong kailangang itala ay ang buong pangalan, tirahan, contact details, petsa ng kapanganakan, kakayahang pangtrabaho, natanggap na sertipikasyon at pagsasanay, at iba pang patunay ng kwalipikasyon.

Mahalaga ang mga ito sa pagbuo ng barangay database para sa mas mabilis na job matching, pagsasanay, at livelihood assistance.

Tinitiyak ng ordinansa na ang database ay mananatiling ligtas at confidential, at gagamitin lamang para sa employment facilitation.

Ang Public Employment Service Office (PESO) ang mangangasiwa sa barangay registries at sa itatatag na Citywide Skilled Workers Database.

Sila din ang makikipag-ugnayan sa mga negosyante, industriya, at training institutions upang ipatupad ang mga programa sa career alignment, skills training, at employment assistance.

Ang nabanggit na tanggapan din ang mamamahala sa job fairs at iba pang employment-related initiatives.

Upang mapanatili ang accuracy at relevance ng database, magsusumite ang mga barangay ng quarterly reports sa PESO para sa monitoring at coordination.

Bilang pagtugon naman sa aktibong partisipasyon sa programa, kikilalanin ng pamahalaang lungsod ang mga manggagawa, barangay, at stakeholders na may mahalagang ambag sa pagpapatupad ng ordinansa. (PIO Batangas City)