Humigit kumulang sa 3,000 kababaihan sa lungsod ang lumahok sa Women’s Month celebration sa Batangas City Sports Coliseum ngayong araw, March 8.

Nagsimula ang pagdiriwang sa pamamagitan ng isang banal na misa sa Basilica ng Immaculada Conception na dinaluhan ng women;s group mula sa ibat-ibang barangay.

Pumarada sila patungong Sports Coliseum kung saan isinagawa ang inihandang programa ng City Social Welfare & Development Office (CSWDO) at ng Kalipunan ng Liping Pilipina (KALIPI).

Layunin ng pagtitipon na ipagdiwang ang tagumpay ng mga kababaihan habang kinikilala ang mga hamon na patuloy nilang kinakaharap sa pagkamit ng pagkakapantay-pantay o equality.

Ayon sa mensahe ni CSWD Officer Hiyasmin Candava, mahalaga ang papel na ginagampanan ng mga kababaihan hindi lamang sa kanilang pamilya kundi sa kaunlaran at kapakanan ng kanilang komunidad.

Tampok sa naturang programa ang pagkilala sa mga dating KALIPI Ppresident sa patuloy nilang ambag sa pagpapaunlad ng kanilang barangay.
Ginawaran ng Leadership award sina Nely Asi ng Conde Labac, Leonisa Vargas ng Tingga Itaas at Desirey Macalalad ng Talahib Pandayan habang Exemplary Service Award ang ipinagkaloob kay Cecile Bayani ng Sta Rita Karsada.

Nahirang na Best Women’s Group ang Talahib Pandayan dahil sa ipinakitang pagkakaisa at pagtutulungan ng mga ito sa pagpapatupad ng mga programa ng pamahalaang lungsod sa kanilang komunidad.

Nagdaos din ng KALIPI Got Talent na nilahukan ng 10 kababaihan mula sa ibat ibang cluster.
Tinanghal na grand winner ni Felisa Zapata mula sa Talahib Pandayan.

Ikalawang pwesto sina Cherry Lou Mercado at Madelaine Andal ng Bolbok habang 3rd prize winner si Grace Advincula ng barangay poblacion 4.
Nakiisa at nagpaabot ng pagbati sa mga kababaihan sina Mayor Beverley Dimacuha, Congressman Marvey Marino, VM Alyssa Cruz, Bokal Claudette Ambida, BM Bart Blanco at mga myembro ng Sangguniang Panglungsod "WE for Gender Equality and Inclusive Society – Lipunang Patas sa Bagong Pilipinas: Kakayahan ng Kababaihan, Patunayan” ang tema ng Women’s Month celebration ngayong taon 2024 hanggang 2028. (PIO Batangas City)