TINGNI: Ipatutupad na sa lungsod ang Ordinance No 22-36 S 2023 o ang “ An Ordinance Institutionalizing the Programs, Services, Privileges and Benefits for Solo Parents and their Children, or the Expanded Solo Parent Welfare Ordinance of Batangas City”.

Ito ay akda ni Councilor Ched Atienza na naglalayong mabigyan ng komprehensibong serbisyo at pribilehiyo ang mga single parents sa lungsod.
Hangad din nito na mapangalagaan ang kanilang mga karapatan at matulungan sila sa pagtataguyod ng kanilang mga anak.
Ang solo parent ay yaong magulang na may sole parental care at support sa mga bata.

Kabilang dito ang mga byudo o byuda, napawalang bisa o annulled ang kasal at inabandona ng asawa o kinakasama, biktima ng rape, asawa ng nakakulong o nahatulang mabilanggo at hindi sapat ang mental na kapasidad.

Itinuturing ding solo parent ang asawa ng Overseas Filipino Worker (OFW) na nasa low/semi skilled worker category at wala sa bansa sa loob ng isang taon.

Gayundin ang mga unmarried mother/father, sinumang myembro ng pamilya na tumatayong legal guardian at syang nangangalaga sa mga bata at umaaktong magulang dahil sa pagkamatay, pagkawala, pag-abandona ng mga tunay na magulang.

Ang isang solo parent ay kailangang magpatala sa barangay at sasailalim sa assessment upang malaman kung kwalipikado sa mga benepisyo.
Ang aplikante ay kailangang residente ng lungsod at kumikita ng mas mababa sa poverty threshold na itinatakda ng National Economic Development Authority (NEDA).

Prayoridad sila sa scholarship programs, medical assistance, livelihood assistance, employment assistance at training programs.
Ang mga solo parent naman na kumikita ng mas mataas sa itinakdang poverty threshold ng NEDA ay makakakuha lamang ng limitadong benepisyo tulad ng flexible work schedule at leave privileges na pitong araw sa isang taon (with pay) bukod pa sa leave benefits ng isang regular na empleyado.
Isinasaad din sa naturang ordinansa na makakatanggap ng financial assistance na P 2000 ang mga mauulila ng solo parent.

Kailangang kumuha ng solo parent ID upang makinabang sa mga nabanggit na pribilehiyo.
Ang sinumang lalabag sa naturang ordinansa at mapapatunayang nagpalsipika ng mga dokumento upang makakuha ng benepisyo ay papatawan ng kaukulang parusa.

Magtatalaga ng Solo Parent Desk ang pamahalaang lungsod na pangangasiwaan ng City Social Welfare and Development Office (CSWDO).
(PIO Batangas City)