Libu-libong deboto ng Mahal na Poong Sto. Niño ng Batangan ang lumahok sa fluvial procession na idinaos noong January 7 bilang pagpapakita ng kanilang malakas na debosyon sa Mahal na Patrong Sto. Nino.

Ang taunang fluvial procession ng Sto. Nino sa Calumpang River ay idinadaos tuwing simula ng nobena ng kanyang kapistahan sa ika-16 ng Enero.
Ang naturang gawain ay hindi lamang pasasalamat sa mga biyayang kanilang natatanggap kundi ang patuloy na tulong at gabay ng Mahal na Poon sa kanilang buhay.

Nagsimula ang fluvial procession na nilahukan ng mahigit sa 50 bangka sa barangay Sta. Clara patungong Calumpang River sa pangunguna nina Vice Mayor Alyssa Cruz, City Administrator Engr. Sonny Godoy, Immaculate Concepcion Parish Priest Fr. Angel Pastor kasama ang ilang opisyal ng pamahalaang lungsod.

Sa buong panahon ng fluvial procession, isinagawa ang pag-awit ng dalit sa Mahal na Patrong Sto Nino.
Pinangunahan naman ni Archbishop Gilbert Garcera at mga kaparian mula sa Basilica at iba pang parokya ng Archdiocese ng Lipa ang pagsalubong sa Mahal na Patron sa tulay ng Calumpang kung saan hinandugan ng sayaw na Subli ng mga mag-aaral mula sa iba’t ibang paaralan at community group ang Sto Nino bago isagawa ang prusisyon sa kabayanan.

Makikita ang iba’t ibang imahen ng Sto. Niño sa labas ng mga bahay sa poblacion habang dumadaan ang prusisyon.
Pagdating ng simbahan, sinalubong ang prusisyon ng isang magarbong fireworks display.

Nagtapos ang nasabing religious activity sa pamamagitan ng isang Banal na Misa sa Basilica na pinamunuan ni Archbishop Garcera. (PIO Batangas City)