Mga ninakaw na gamit, narekober ng mga pulis, suspek nakabilanggo na.

Details

Monday, 05 September 2022 - 4:46:27 PM

Nasakote ng mga tauhan ng Batangas City Police Station (BCPS) ang suspek sa pagnanakaw ng laptop at iba pang kagamitan ng isang nursing student sa barangay Cuta Looban, September 5. Siya ay kinilalang si Norbel Mellendrez Jr., construction worker at residente ng barangay Poblacion 4.

Ayon sa report ng pulisya, bandang 2:45 hanggang 2:57 ng madaling araw noong September 1 nang pasukin ng suspek ang tinitirahang boarding house ng biktima sa brgy. Cuta, Looban. Kinuha ng suspek ang Acer laptop na nagkakahalaga ng P34,000.00, Real Me Note 10 celllphone na P14,000.00 at wallet na may lamang P3,000.00 cash, ATM at mga ID cards na pag-aari ng biktima.

Positibong kinilala ang suspect mula CCTV footage ng barangay na siya ring naaresto sa illegal drug operation ng Batangas City PNP noong September 2. Si Mellendrez ay pansamantalang nakakulong sa BCPS Detention Cell at sinampahan ng mga kaso sa illegal drugs at pagnanakaw.

Lubos ang pasasalamat ng biktima na si Andrey Marie Piaduche, 20 taong gulang, sa mabilis na aksyon ng kapulisan para mabawi ang mga ninakaw nyang gamit. Hinihikayat ni OIC-City PNP Chief PLTCOL Dwight Fallurin Fonte Jr., ang mga mamamayan ng lungsod na agad i-report ang anumang iligal na gawain upang agarang maaksyunan. (PIO Batangas City)

• < Prev
• Next >