Farmer’s Market Day, inilunsad

  1.jpg 10.jpg 2.jpg 3.jpg 4.jpg 5.jpg 6.jpg 7.jpg 8.jpg 9.jpg

Inilunsad ng SM Foundation ang Kabalikat sa Kabuhayan (KSK) Farmer’s Market Day sa SM City Batangas ngayong araw, July 24. Layunin nito na mabigyan ng pagkakataon ang mga magsasaka ng lungsod na makapagtinda ng libre ng kanilang mga produkto isang beses sa isang linggo sa nasabing mall mula ngayong Hulyo hanggang buwan ng Disyembre.

Ang mga kalahok dito ay ang mga KSK graduate na sumailalim sa 16 na linggong training program ng SM Foundation hinggil sa produksyon ng organic high-value crop farming. Sila din ay pawang mga myembro ng Batangas City Vegetable Growers Association (BCVGA). Magugunita na inilunsad ang KSK sa lungsod noong taong 2012 (Batch 49) at noong 2019 (batch 202) katuwang ang lokal na pamahalaan.

Kasama ng mga magsasaka bilang beneficiaries ng programa ang mga miyembro ng KALIPI, recipients ng Pantawid Pamilyang Pilipino Program o 4P’s at ilang residente ng barangay Pinamucan Ibaba. Bukod sa pagkakaroon ng karagdagang kita, hangad din ng Farmer’s Market Day na maipagpatuloy ang paglinang sa kasanayan at kaalaman ng mga KSK farmer graduates at maishowcase ang mga de kalidad na prutas at gulay na kanilang mga produkto.

Katuwang ng SM Foundation ang SM Supermalls Department of Agriculture (DA), Department of Trade and Industry (DTI) sa proyektong ito. Binigyang diin ni SM City Batangas Assistant Mall Manager Engr. Bernard M. Coronel na magpapatuloy ang SM sa pagsuporta sa sektor ng agrikultura. Lubos naman ang pasasalamat ng Hepe ng Office of the City Veterinary and Agricultural Services (OCVAS) at kinatawan ni Mayor Beverley Dimacuha na si Dra Loyola Bagui sa SM Foundation sa aniya ay magandang pagkakataon at malaking tulong na ipinagkaloob sa mga magsasaka ng lungsod. Dumalo din sa nasabing okasyon si City Agriculturist Flor Alvarez. (PIO Batangas City)