Nagkamit ng karangalan bilang Cum Laude ang isa sa pitong scholars ng Alay Lakad na nagtapos sa kolehiyo ngayong taon.

Details

Friday, 08 July 2022 - 5:35:44 PM

Siya ay si Abigail Hazel Gutierrez ng barangay Kumintang Ilaya na nagtapos ng kursong Bachelor in Elementary Education sa Saint Bridget College. Siya at ang anim pang college scholars ay iprenesenta sa virtual meeting ng Alay Lakad Executive Committee (Execom) ngayong araw.

“Kayo ang naging inspirasyon ko upang pagbutihin ko ang aking pag-aaral at kayo ang naging daan upang matupad ko ang pangarap ng aking pamilya”, sabi ni Gutierrez. May apat na kabataan naman ang nagtapos sa senior high school.

Lubos ang pasasalamat ng mga beneficiaries sa tulong na ipinagkaloob ng Alay Lakad upang makapagtapos sila ng pag-aaral. May 35 scholars ang Alay Lakad para sa school year 2021-2022 kung saan tatlo dito ay full scholar habang may limang persons with disability (PWD).

Ang Alay Lakad isang samahang binubuo ng mga kinatawan mula sa pampubliko at pribadong tanggapan na naglalayong matulungan ang mga kabataang nabibilang sa pamilyang higit na nangangailangan na makapagtapos ng pag-aaral.

Ang pondong ginagamit sa scholarship program nito ay mula sa halagang naipon sa pagsasagawa ng “walk” tuwing buwan ng Setyembre. Nahinto ang pagsasagawa nito dahil sa pandemya kung kaya’t tinalakay sa nasabing pagpupulong ang ilang fundraising projects para maipagpatuloy ang kanilang scholarship program. (PIO Batangas City)

• < Prev
• Next >