Sangguniang Panglungsod Inaugural Session, idinaos

Details

Tuesday, 05 July 2022 - 4:32:14 PM

Idinaos ang inaugural session ng Sangguniang Panglungsod (SP) ng Batangas ngayong araw na sya ring hudyat ng pagsisimula ng panunungkulan ng mga bagong halal na Konsehal ng lungsod.

Nagsimula ang sesyon sa pamamagitan ng pagpapakilala sa pangalawang punong lungsod na si Vice-mayor Alyssa Cruz at sa 12 myembro ng Konseho kasama ang Association of Barangay Council at Sangguniang Kabataan Federation representatives.

Naghain ng mosyon si Kagawad Nestor Boy Dimacuha para sa unang item sa mga Bagong Pag-uusapan hinggil sa adoption ng internal rules of procedure ng SP kung saan ito ang magsisilbing guide sa pagsasagawa ng sesyon. Matapos i-adopt ang unang item, binasa naman ni konsehal Oliver Macatangay ang standing committees ng SP kasama na ang chairmanship at membership ng mga ito.

Nagpaabot ng pagpapasalamat si Vice Mayor Cruz sa lahat ng sumuporta sa kaniyang kandidatura sa kaniyang inaugural speech. Aniya, sisikapin niyang tapatan ang pagtitiwalang ibinigay sa kanya ng mga Batangueno. “Napakalaki ng ekspektasyon sa inyong abang lingkod subalit alam kong makakaya nating lahat ito sa pamamagitan ng pagkakaisa at pagtutulungan,” sabi ni Cruz Inilatag din ni Cruz ang limang puntos na nais niya aniyang magawa bago matapos ang kaniyang termino.

Una na rito ay ang pagsusulong ng epektibong talakayan kasama ang mga department heads ng lokal na pamahalaan upang mabilis na mabigyan ng aksyon ang mga kailangan ng lungsod. Ikalawa ay ang pakikipagtalakayan sa mga ahensya ng national government upang magkaroon ng malinaw na kasagutan ang mga idudulog na programa, proyekto at maging ang mga hinaing ng mga Batangenyo.

Ikatlo ay ang pagsasaayos ng Sangguniang Panglungsod website. Ikaapat ay ang pagbibigay suporta sa mga kawani ng sanggunian na nagnanais magkaroon ng dagdag na kaalaman sa pamamagitan ng mga seminar, trainings at maging mga online webinars at ang panghuli ay ang pagkakaroon ng People’s Lobby upang buksan ang SP sa mga tao at personal nilang marinig ang hiling ng mga ito.

Ipinakita niya sa pamamagitan ng isang video presentation ang perspective ng bagong gusali ng SP na inaasahang magagawa sa mga susunod na taon. (PIO Batangas City)

• < Prev
• Next >