Libreng spay at neuter ng aso at pusa, isinagawa ng OCVAS

  1.jpg 2.jpg 3.jpg 4.jpg 5.jpg 6.jpg 7.jpg 8.jpg

May 50 aso sa lungsod ang sumailalim sa programang free spay and neuter ng Livestock Division ng Office of the City Veterinary and Agricultural Services (OCVAS), June 15. Ang nasabing programa ay ang pag-aalis ng matris ng isang babaeng hayop (spay) at pagkakapon (neuter) sa mga lalaking hayop bilang paraan ng pagkontrol ng pagdami ng mga ito lalo na ng mga asong gala. Ito ay sa pakikipagtulungan ng OCVAS sa Provincial Veterinary Office (ProVet).

Ayon kay Asst. City Veterinarian Dr. Flor Abe, ang pagkapon at pagtanggal ng matris ng aso ay may maganda ring epekto sa kalusugan ng mga ito. Nababawasan din aniya ang pagiging agresibo at hindi stressed ang aso na maghanap ng mate na bababahan.

Nagpapasalamat ang dog owner na si Mercedes Fernandez ng barangay Poblacion 20 sa libreng proyektong ito ng OCVAS dahil hindi na sila gagastos pa ng malaki sa mga private veterinarians. Ipinapayo naman ni Dr Abe ang responsible pet ownership sa pamamagitan ng pagbibigay ng maayos na tirahan, tamang pagkain, pagpapabakuna laban sa rabies at pagtatali sa mga ito upang hindi gumala.

Sa mga may-ari ng aso na nagnanais pabakunahan ng anti-rabies vaccine o nais makinabang sa nasabing proyekto, tumawag lamang sa Livestock Division sa 7238432. (PIO Batangas City)