SINAG at Biyahero program, inilunsad sa barangay Ambulong

Details

Thursday, 25 November 2021 - 4:59:51 PM

Pinangunahan nina Pilipinas Shell Petroleum Corporation (PSPC) South Luzon Area Terminal Manager Anna Estandarte at Pilipinas Shell Foundation Inc. (PSFI) Executive Director Sebastian Quiniones ang turn over ceremony ng solar powered streetlights sa barangay Ambulong noong ika-24 ng Nobyembre.

Ito ay sa ilalim ng Save, Invest and Nurture Access to Green Energy and Technology (SINAG) project ng Shell Import Facilities (SHIFT) na naglalayong makapagbigay ng karagdagang liwanag sa mga daan at mabawasan ang pagkakaroon ng mga aksidente sa national highway na nasasakupan ng nabanggit na barangay. Magugunita na noong Enero 2021, nag-install din ang SHIFT ng solar power street light posts sa barangay San Isidro.

Lumagda sa isang Memorandum of Agreement (MOA) ang PSFI, Pangulong Manolo Macatangay ng barangay Ambulong at Pangulong Andres Malibiran ng barangay San Isidro bilang simbolo ng commitment para sa naturang proyekto. Kaugnay nito, nagkaloob din ang nasabing kompanya ng Road Safety and DRRM Materials Tools and Equipment sa nasabing mga barangay kabilang ang barangay Libjo upang magamit nila sa disaster response tulad ng fire extinguisher, chain saw, ropes, bolo, shovel, traffic cones, stop and go traffic devices, reflectorized vest at iba pa.

Ito ay sa ilalim ng Biyahero (Be a Hero) program na naglalayong masiguro ang kaligtasan sa kalsada partikular ng mga kabataan. Naglagay din ng mga road signages at road safety support tulad ng pedestrian lane, thermoplastic pavement parkings, pedestian crossings, reflectorized cones at yellow lanes. May 31 community volunteers ang sumailalim sa pagsasanay para maging maintenance team ng solar powered streetlights habang may 56 indibidwal naman ang nagtrain sa road safety na makakatulong sa pagpapatupad ng nabanggit na programa.

Lubos ang pasasalamat ng pamunuan ng mga naturang barangay at binigyang diin na ang SINAG at Biyahero program ay pagpapatunay ng magandang ugnayan ng PSPC sa mga host barangays nito. Sinabi naman ni Batangas City Police Station Chief PltCol. Gerry Laylo na nabawasan ang mga road accidents sa mga nabanggit na barangay mula nang ipatupad ang mga programa ng PSPC. Isinagawa ang ceremonial switch on ng solar powered streetlights pagkatapos ng turn over ceremony. (PIO Batangas City)

• < Prev
• Next >