Noche buena package ipapa-raffle ng city government sa mga magpapabakuna

Details

Monday, 22 November 2021 - 4:33:30 PM

Bilang pakikiisa ng pamahalaang lungsod sa National Vaccination Days o “Bayanihan, Bakunahan” ng national government sa November 29 hanggang December 1, magpapa-raffle ng noche buena package ang pamahalaang lokal para sa mga residente na magpapabakuna mula November 26 hanggang December 1.

Layunin nito na mahikayat ang mga mamamayan na magpabakuna bilang proteksyon sa kanilang sarili, sa kanilang pamilya at komunidad laban sa COVID-19. Ayon kay City Health Officer, Dr. Rosanna Barrion, target ng kanilang tanggapan na makapagbakuna ng mahigit sa 10,000 residente sa bawat araw sa mga nabanggit na petsa upang makamit ang 100 % ng 70% population protection.

Kaugnay din nito ay magdadagdag ang pamahalaang lungsod ng tatlo pang vaccination sites. Ang mga ito ay ang covered court ng barangay Alangilan, Bolbok at San Isidro. Makakatulong ng pamahalaang lungsod sa 3-day National Vaccination ang mga pribado at pampublikong ospital, medical associations at medical personnel ng iba't ibang ahensya ng gobyerno.

Ayon sa CHO report noong November 20, 61 % ng populasyon ng lungsod ang fully vaccinated at 81% naman ang nakatanggap na ng 1st dose. Samantala, ang 250 na magwawagi sa raffle ay pipiliin sa pamamagitan ng electronic raffle na isasagawa sa December 3. Ipo-post ang pangalan ng mga winners sa Palakat Batangas City Facebook page. Inaayos naman ng komite ang mga alintuntunin ng pa-raffle para sa mga naunang nagpabakuna. (PIO Batangas City)

• < Prev
• Next >