Pista ng Kalikasan, isinagawa

Details

Friday, 16 July 2021 - 4:35:18 PM

May 70 endemic trees ang itinanim sa mga bakanteng lote sa Batangas City Grand Terminal bilang bahagi ng Pista ng Kalikasan ngayong araw, July 16. Ang mga ito ay tuog, narra, molave at alibangbang.

Ang tree planting ay isa sa mga gawaing inihanda para sa pagdiriwang ng ika-52 taong pagkakatatag ng lungsod. Ang pagtatanim ay pinangunahan ng City Environment and Natural Resources Office (City ENRO) kasama ang ilang opisyales ng Batangas Ventures Properties and Management Corporation na operator ng grand terminal.

Ayon kay Oliver Gonzales, hepe ng City ENRO, ang tree planting ay taon-taon na isinasagawa bilang commitment ng pamahalaang lungsod sa greening program nito. “Ilan sa mga puno na itinanim ay galing sa mga replacement o pamalit sa mga punong pinutol noon habang ang iba naman ay bigay ng Malampaya Foundation,” sabi ni Gonzales.

Lubos ang kagalakan ng pamunuan ng Batangas Ventures sa pagkakapili sa kanila bilang partner ng city government sa nasabing gawain. Ayon kay Christy Villamor, Finance and Administration Manager ng naturang kumpanya, gagawin nila ang lahat ng kanilang makakaya upang mapangalagaan ang mga punong itinanim upang hindi ito masayang.

“Malaking tulong ang mga puno sa amin bilang absorbing agent dahil marami ditong sasakyan na nagdudulot ng polusyon kaya naman lubos ang aming pasasalamat sa city government,” ayon kay Villamor.

Idinagdag din niya na ang Operations and Safety Department nila ang siyang nakatalagang mangalaga at magbabantay sa mga puno. (Batangas City PIO)

• < Prev
• Next >