Mga establisyimentong nagpapatupad ng minimum public health standards, gagawaran ng safety seal

  1.png 2.png 3.png 4.png

Magsisimula nang maggawad ng safety seal ang pamahalaang lungsod sa mga establisimyento sa Batangas City na mapapatunayang compliant sa minimum public health standards (MPHS) na nakapaloob sa “Implementing Guidelines of the Safety Seal Certification Program’.

Ang nasabing programa ay alinsunod sa joint memorandum circular ng Department of Labor and Employment (DOLE), Department of Health (DOH), Department of Interior and Local Government (DILG), Department of Tourism (DOT) at Department of Trade and Industry (DTI) No. 21-01 S. 2021 na may petsang April 23, 2021.

Layunin nito na masiguro na striktong naipapatupad ng mga establisyimento ang mga health at safety at protocols upang matiyak ang kaligtasan ng mga mamimili gayundin ay upang mahikayat ang publiko na tangkilikin ang mga business establishments na nagawaran ng safety seal.

Kaugnay nito, nakatakdang magsagawa ng monitoring at inspection ang City Safety Seal Inspection and Certification Committee sa mga business establishment simula bukas, June 25 upang tiyaking nakakasunod ang mga ito sa MPHS kontra COVID-19. Ang naturang committee ay nabuo alinsunod sa Executive Order (EO) ni Mayor Beverley Dimacuha sa pamumuno ni Business Permit and Licensing Officer (BPLO) Ditas Rivera bilang Chairperson.

Ilan sa mga myembro nito ay ang mga kinatawan mula sa City Health Office (CHO); City Disaster Risk Reduction Management Office (CDRRMO); Batangas City PNP; Public Information Office, information Technology Service Division (ITSD) at EBDMT Monitoring Team. (PIO Batangas City)