Pagbabakuna kontra COVID-19 sa A1 groups sa Batangas City, nagsimula na

Details

Wednesday, 21 April 2021 - 3:42:23 PM

Nagsimula na ang pagbabakuna ng unang dose ng Sinovac vaccine para sa 1,051 health professionals sa mga pampubliko at pribadong health facilities na kabilang sa A1 priority groups sa lungsod sa pangunguna ni City Health Officer Dra Rosanna Barrion, April 21.

Bukod sa mga kawani ng CHO, kabilang sa A1 group ang mga BHW, BNS, BSPO, BHERTS gayundin ang mga nasa dental clinics, free standing clinics (medical & optical), frontliners sa mga paaralan , healthcare, CDRRMO, DILG at CSWDO. Ang pagbabakuna ay tatagal hanggang Byernes sa Batangas City Convention Center na itinalagang isa sa mga COVID-19 vaccination sites sa Batangas City.

Ayon kay Dr. Barrion malaking tulong ang nasabing bakuna sa mga kawani ng CHO na araw-araw na humaharap sa hamon ng pandemya. Umaasa siya na sa mga darating araw ay dadating na din ang iba pang bakuna mula pa din sa national government para naman sa mga senior citizens.

Hinati sa tatlong batch ang tatanggap ng bakuna mula otso ng umaga hanggang alas singko ng hapon. May anim na hakbang na ipinatutupad sa pagbabakuna. Una ay ang pag-i-isolate ng mga babakunahan sa waiting area. Susundan ito ng registration. Ikatlo ay ang counseling, ikaapat ang screening, ikalima ang vaccination at at panghuli ang post vaccination and monitoring kung saan maghihintay ang mga nabakunahan ng 15 hanggang 30 minuto para maobserbahan kung mayroong hindi magandang nararamdaman.

Ang ikalawang dose ay ipagkakaloob pagkatapos ng apat na linggo. Binigyang diin ni Barrion na kahit nabakunahan na, kinakailangan pa ding sumunod sa mimimum public health standards upang masiguro ang kaligtasan laban sa COVID-19. (PIO Batangas City)

• < Prev
• Next >