Tugon sa tumataas na bilang ng COVID-19 cases sa lungsod, inilatag

Details

Friday, 16 April 2021 - 4:33:04 PM

May 20 public schools sa lungsod ang nakatakdang gamitin bilang temporary quarantine o isolation facilities upang matugunan ang kakulangan sa pasilidad dahil sa dumadaming kaso ng COVID-19 sa Batangas City alinsunod sa Executive Order ni Mayor Beverley Dimacuha noong April 14.

Ang mga paaralang ito ay tinukoy ng COVID-19 Incident Management Team (IMT) ayon sa mga requirements ng Department of Health (DOH). Magugunita na may limang Temporary Treatment and Monitoring Facilities (TTMFs) ang pamahalaang lungsod kung saan dinadala ang mga mild cases.

Ang mga severe cases naman ay dinadala sa mga ospital na tulad ng ibang bayan at lalawigan ay full capacity na din sa kasalukuyan. Sa magkasunod na pagpupulong ng IMT noong April 13 at April 16, ipinag-utos nina Mayor Dimacuha at Congressman Marvey Mariño ang agarang aksyon para mapigilan ang pagkalat ng virus at masolusyunan ang iba pang suliranin at pangangailangan kaugnay ng tumataas na bilang ng kaso ng nagpopositibo sa COVID-19.

Ipinag-utos nila na maihanda ang budget para makapag-hire ng karagdagang medical workers/personnel, makabili ng mga gamot , medical equipment, mga PPE’s at iba pang kailangang gamit upang higit na mapalakas ang COVID-19 response programs ng pamahalaang lungsod.

Inutos din nila ang mas maigting na information dissemination campaign at istriktong monitoring ng health and safety protocols para mapigilan ang pagkalat ng virus. Hiniling ni Mayor Dimacuha at Congressman Marino sa mga lider ng iba’t ibang religious denomination na magsagawa ng online spiritual at mental healing sa mga COVID-19 patients at sa City Social Welfare and Development Office (CSDWO) na magkaroon ng psychosocial debfriefing sa mga ito bilang paghahanda sa pagbalik nila sa komunidad. (PIO Batangas City)

• < Prev
• Next >