Tatlong residente ng barangay Dela Paz na nawawala, natagpuan na

  1.jpg 2.jpg 3.jpg 4.jpg 5.jpg 6.jpg

Nakabalik ng ligtas sa kani-kanilang pamilya ngayong araw ang tatlong residente ng barangay Dela Paz Proper na naiulat na nawawala matapos hampasin ng malalakas na alon ang kanilang sinasakyang bangkang pangisdaan na naging dahilan ng paglubog nito noong ika-25 ng Oktubre.

Ang mga ito ay nakilalang sina Ronaldo Lumanglas , 43 at dalawang pamangkin na edad 10 at 11 na magkakasamang pumalaot bandang alas 7:00 ng umaga noong Linggo. Ito ay sa kabila ng pagbabawal ng pamahalaang lungsod sa mga mangingisda na pumalaot dahil sa panganib ng bagyong Quinta.

Kaagad naglunsad ng rescue operation ang City Disaster Risk Reduction Management Office (CDRRMO) at nakipag-ugnayan sa mga karatig bayan at lalawigan upang mahanap ang tatlo. Nagsagawa din ng imbestigasyon ang Batangas City Police Office.

Ayon sa ulat ng CDRRMO, napadpad ang magtitiyo sa barangay Liponpon, Isla Verde kung saan nakipag-ugnayan ang nasabing tanggapan hinggil sa pagsundo sa mga ito.Kaagad silang isinailalim sa medical check up sa City Health Office (CHO).

Pinakain, binigyan ng tsinelas at sumailalim sa psychosocial debriefing ng City Social Welfare and Development Office (CSWDO) ang dalawang bata. Nakatakda ding sumailalim sa counselling ang kanilang pamilya. Dinala rin ang mga ito sa Jesus of Nazareth Hospital para sa masusing medical check-up. (PIO Batangas City)