Nutrition workers pinakikilos upang maiwasan ang malnutrition sa mga evacuation centers

Details

Thursday, 23 January 2020 - 1:12:00 PM

BATANGAS CITY-Pinakikilos ngayon ng National Nutrition Council (NNC) Region 4-A ang mga City/Municipal Nutrition Action Officers at Provincial Nutrition Clusters upang maiwasan ang problema sa malnutrition sa mga evacuation centers kung saan tumitigil ang mga biktima ng pagputok ng Bulkang Taal.

Sa emergency meeting ng nasabing council , January 22, sa Provincial Health Office, sinabi na coordinator nito na si Carina Santiago na layunin ng pagpupulong na ma activate ang Provincial Nutrition Cluster para matugunan ang higit na pangangailangan sa masustansiyang pagkain ng mga bata, sanggol, mga buntis at mga inang nagpapasuso.

Unang inalam ng nutrition council kung ano ang kalagayan ng mga evacuees sa lahat ng evacuations centers sa buong probinsya.

Ayon kay Santiago, mahalaga ang mga reports at data na kanilang makakalap sa bawat bayan dahil dito nila malalaman ang kalagayan ng kalusugan ng mga bata, mga buntis at matatanda. “Sa dami ng evacuation centers at mga evacuees na naroroon, importante sa amin ang mga datos na ibinibigay sa amin para malaman namin ang dapat gawin upang matugunan ang mga pangangailangan at hindi maging malnourished ang mga bata at sanggol at maiwasan na sila ay mag kasakit. Nais naming masiguro na walang mamamatay dahil sa malnutrition,” dagdag pa ni Santiago.

Para madaling matugunan ang nutritional needs ng mga bata, kailangang ma locate muna at makuha ang datos kung ilan ang mga batang malnourished at yuong mga tama ang timbang.

Ang NNC ay nagbigay sa mga Barangay Nutrition Scholars (BNS) at health centers ng Middle Upper Arm circumference o MUA Tape upang gamitin sa pagkuha ng timbang ng mga sanggol na may edad 06-59 months at mga babaeng buntis. Para sa mga sanggol na bagong panganak o yung 0-5 months old, dapat timbangin sila sa pamamagitan ng baby weighing scale.

Bingyang diin naman ni Jellie Ann Palencia, NNC nutritionist dietician, na mahigpit na ipinagbabawal tumanggap ang mga evacuation centers ng donasyon ng infant formula sapagkat ang isinusulong ng Dept. of Health ay ang breastfeeding.

Nagbigay din ng mga vitamins at babasahing nutri komiks series 1, 2, 3 at 6 upang mas lalong malaman ang kahalagahan at tungkulin ng isang breast- feeding mother.

Bawat city/municipality BNS cluster coordinator sa buong probinsya ng Batangas ay kainakailangan mag submit ng reports at datos o listahan ng mga evacuation centers na mayroon mga sanggol, buntis, nagpapasusong ina at matanda sa NCC upang mabigyan ng agarang tulong para maiwasan ang malnutrisyon at pagkakasakit.

• < Prev
• Next >