Covered court sa Banaba West, Pinasinayaan

  banabawest1.jpg banabawest2.jpg banabawest3.jpg banabawest4.jpg banabawest5.jpg banabawest6.jpg

Pinasinayaan kaninang umaga ang Multi- purpose Covered Court sa Barangay Banaba West na ipinangako ni Mayor Eddie Dimacuha sa mga residente nito na binigyang katuparan naman ni Mayor Beverley Dimacuha.

Pinangunahan nina Mayor Beverley Dimacuha, Congressman Marvey Mariño at Governor Dodo Mandanas ang ribbon-cutting ceremony ng nasabing proyekto.

Sinimulan ang konstruksyon nito noong Nobyembre 2016 at natapos noong Pebrero ng kasalukuyang taon. Ito ay tinayo sa mahigit 300 metro kwadradong lupa katabi ng Brgy. Hall at Day Care Center at may kumpletong ilaw at pasilidad ng isang basketball court.

Sinabi ni Mayor Dimacuha na bukod sa mga sports activities ay magamit din sana ang covered court sa iba pang okasyon ng barangay o bilang evacuation center sakaling kailanganin. Tiniyak rin ni Mayor Beverley na ipagpapatuloy ng kanyang administrasyon ang mga sinimulang programa ni Mayor Eddie Dimacuha ngunit hindi niya ito mapapagsabay sabay. Aniya ang kanyang pagiging mayor ay katulad ng isang ina na may 105 (barangay) anak na kailangan din pagbigyan ang mga kahilingan. “Mabuti na lang at katuwang ko si Cong. Marvey, pag di na kaya ng Mayor, ke Congressman natin hihingin at malakas ako sa kanya, “ sabi ni Mayor Dimacuha.

Sinagot naman ni Cong. Marvey Mariño ang pagpapapintura ng sahig ng covered court at ang mga referees para sa isasagawang liga ng barangay. Inilahad niyang muli ang proyektong magkatuwang nilang ipapagawa ni Mayor Dimacuha sa lungsod, tulad ng konstruksyon ng dalawang palapag na Public Library, Life Transformation Sanctuary (Rehabilitation Center) at iba pa.

Ipinaalam rin ni Gov. Mandanas ang ilan sa mga bagong proyekto ng kanyang administrasyon kagaya ng karagdagang benepisyo para sa mga Barangay Health Workers, Day care Workers, Barangay Tanod at iba pa. Laking pasalamat naman ni Brgy. Chairman Mina Lusanta sa mga opisyal dahil sa suporta ng mga ito sa kanilang barangay. (PIO Batangas City)