Pulis mas mahigpit sa mga magtitinda ng paputok

Details

Friday, 25 November 2016 - 2:23:08 PM

BATANGAS CITY- Magiging mas mahigpit ang kapulisan sa pagpapatupad ng mga batas at regulasyon hinggil sa pagtitinda ng paputok upang maseguro ang kaligtasan ng publiko.

Ito ang sinabi ni PO3 Ding Calalo, Firearms Desk PNCPO, sa orientation na isinagawa nila sa mga magtitinda ng mga paputok at fireworks sa itinalagang lugar sa Batangas City Sports Coliseum sa December 29-31.

Ayon sa kanya, may mga pagbabagong ipatutupad kung saan gagawing mas maluwag ang espasyong dadaanan ng mga mamimili. Kung dati ay itinatambak ng mga magtitinda ang mga produkto sa likod ng kanilang mga pwesto, ang mga ito ay ilalagay mismo sa kanilang mga stalls.

Dapat ay tama ang sukat ng stall at hindi dapat lagyan ng mga Christmas lights. Ang gagamiting extension cord ay dapat heavy duty at matibay. Hindi pwedeng ilapag ang mga paninda sa semento at bawal ang manigarilyo sa loob ng stalls.

Ipininaliwanag ni City Fire Marshall Glenn Salazar ang mga dapat at hindi dapat sa mga linya ng kuryente upang maiiwasang mag karoon ng sunog.

Tinalakay naman ni Ditas Aguado, hepe ng Business Permit and Licensing Office, ang proseso ng pagkuha ng business permits sa pag titinda ng mga paputok. Aniya mas mabuti na ang sumunod sa tamang proseso upang hindi maantala ang pag rerelease ng permit. Ayon naman kay Batangas City Police Chief Barnard Dasugo, mahigpit ang kanilang gagawing pag babantay at pag momonitor sa mga paputok at fireworks na ititinda at sinomang lalabag ay papatawan ng kaukulang parusa at revocation o ban ng kanilang permit at pagkumpiska ng kanilang paninda.

Hinihintay pa rin ang darating na guidelines ni Presidente Rodrigo Duterte kung ano ang pwedeng itinda at iba pang regulasyon. (PIO Batangas City)

• < Prev
• Next >