Batangas City tumanggap ng water tender- fire truck mula sa BFP

  1.jpg 2.jpg 3.jpg 4.jpg 5.jpg 6.jpg 7.jpg 8.jpg

Kabilang ang Batangas City sa 74 na local government units (LGUs) na tumanggap ng mga fire trucks mula sa Bureau of Fire Protection (BFP) kung saan pinagunahan ni President Rodrigo Duterte ang turn-over ceremony, February 11, sa Lapu-lapu Grandstand, Camp General Emilio Aguinaldo, Quezon City.

Tinanggap nina dating Konsehal at ngayon ay Executive Assistant Armando Lazarte, na kumatawan kay Mayor Beverley Dimacuha, at Batangas City BFP F/CInsp Elaine Evangelista ang 2,500 gallon-water tender fire truck mula kina Dept. of Interior and Local Government (DILG) Secretary Eduardo Año, BFP Chief Jose Embang Jr at iba pang opisyales.

Ayon kay F/CInsp Evangelista, malaking tulong ang fire truck na ito para sa tiyak at sapat na suplay ng tubig para tuluyang mapuksa ang apoy. Ito rin ay back up para sa dalawang maliliit na fire trucks na siyang ginagamit sa mga insidente ng sunog sa maliliit na eskinita at panghalili rin sa mga lumang fire trucks.

Sasailalim sa dalawang araw ng training sa pagmamaneho at paggamit ng mga equipment ng truck ang mga tauhan ng BFP.

Pinaalalahanan ni Pangulong Duterte ang lahat ng drivers ng emergency vehicles na magmaneho sa normal speed at gamitin na lamang ang sirena para maiwasan ang aksidente. “All you do is to switch on the siren para malamang nagmamadali.” Ikinuwento niya ang isang pangyayari sa Davao kung saan nakaaksidente ng estudyante ang fire truck driver sa pagmamadali sa pag responde.

Pinasalamatan naman ni BFP Chief Embang Jr. ang pangulo sa suporta nito sa modernisasyon ng ahensya. Ipinamahagi ng BFP sa okasyong ito ang 51 units ng 1,000 gallon- fire trucks, 20 units ng 2,500 gallon- water tender, at tatlong rescue trucks.

Ayon sa tala ng BFP, may fire trucks na ang 145 cities sa bansa, 287 na lamang sa 1,487 municipalities ang wala pang fire trucks . Sa kabuuan ay may 2,848 fire trucks kung saan 2,358 ay mula sa BFP at 490 naman ang pag-aari ng mga LGUs.

Ayon kay BFP Chief Embang Jr., kukumpletuhin ng BFP ang mga LGUs na may fire truck sa darating na taon upang mapaayos ang fire-fighting capability ng mga ito at maseguro ang kaligtasan laban sa sunog. Pinalalakas din ng BFP sa tulong ng mga LGUs ang enforcement ng bagong Implementing Rules and Regulations ng Fire Code of the Philippines lalo na sa koleksyon ng Fire Code fees. (PIO Batangas City)