Papaskong mass wedding itinaguyod ng isang barangay

Details

Thursday, 19 December 2019 - 4:36:00 PM

Pitong pares ng mga magsing irog ang biniyayaan ng libreng kasal sa simbahan sa tulong ng isang barangay captain upang maging legal ang kanilang pagsasama.

Para kay Barangay 24 Chairman Emma Tumambing, isang papaskong regalo niya na maikasal ang mga nagsasamang ito sa Basilica Immaculada Concepcion, December 19.

Katulong niya sa pagtataguyod ng mass wedding ang kanyang asawa na si Dr. Rolando Tumambing at ang barangay council. Isinagawa ni Rev. Fr. Angel Pastor ang pagdiriwang ng sakramento ng kasal.

Ayon kay Tumambing, bukod sa hangaring maging espesyal ang Pasko ng mga magkakaparehang ito, ay nais nilang mapagtibay ang kanilang pagsasama at makapagtaguyod ng Kristyanong mag-anak. Nais rin niyang maramdaman ng kanyang kabarangay ang kaligayahan at biyaya ng pagsasamang may basbas ng Panginoon.

Sinabi niya na malaki rin ang suporta ni Mayor Beverley Dimacuha sa proyektong ito. Libre na aniya ang proseso ng mga papel para sa marriage license, mismong sa kanilang barangay pa isinagawa ang family planning seminar ng PopCom Division ng City Health Office (CHO) at ang pre-marriage counselling ng City Social Welfare and Development Office(CSWDO).

Sa pakikipagtulungan ng Basilica ay nakumpilan ang may 11 indibidwal na siyang isa sa mga requirements ng simbahan sa pagpapakasal.

Sinagot naman ng barangay ang mga dekorasyon ng simbahan at ilan pang gastusin sa proyekto. Naghanda rin ang barangay ng salu-salo para sa mga ikinasal, habang ang ilan sa mga ito ay nagkaroon ng sariling paghahanda. (PIO Batangas City)

• < Prev
• Next >