40 magsasaka nakinabang sa Cattle Fattening Project

Details

Tuesday, 26 November 2019 - 4:01:00 PM

May 40 magsasaka ang tumanggap ng cattle fattening projects mula sa pamahalaang .lungsod ng Batangas sa pangangasiwa ng City Planning and Development Office.

Ang mga ito ang ikalawang batch ng mga project recipients kasunod ang unang batch ng may 100 beneficiaries noong Marso ng taong ito.

Sila ay mula sa barangay Cumba, Maruclap, San Miguel at Paharang Silangan. .

Kaugnay nito, dumalo ang mga beneficiaries sa orientation sa Audio Visual Room ng Colegio ng Lungsod ng Batangas (CLB).

Dumalo din dito ang mga pangulo ng nasabing barangay, na magsisilbing kanilang co-maker sa pagbabayad ng halaga ng proyekto.

Ang bawat isang recipient ay tatanggap ng P25,000 para ibili ng baka. Sasamahan sila ng mga tauhan ng CPDO sa pagbili ng baka sa auction market sa bayan ng Padre Garcia. Hindi kabahagi ang pamahalaang lungsod sa magiging kita o tubo dito at ang halagang P 25,000 ay babayaran nila sa loob ng tatlong taon nang walang interest.

Kasama din sa naturang halaga ang gastos pagpoproseso ng mga dokumento at ang pamasahe o trucking upang maiuwi ang aalagaang baka.

Ayon kay City Planning and Development Coordinator Januario Godoy, mula 1988, may P 35 milyon ang halagang ginugol ng pamahalaang lungsod para sa proyektong ito at 2,470 beneficiaries na ang nakinabang dito.

Binigyang diin ni Mayor Dimacuha sa kanyang mensahe sa mga beneficiaries na layunin ng proyektong pag-aalaga ng baka na makatulong upang maiangat ang antas ng pamumuhay ng mga Batangueno.

Binanggit din niya ang ilulunsad na proyekto ng pamahalaang lungsod na Eto Batangueno Disiplinado, Magkatuwang Tayo. At kaugnay aniya nito ay hiniling niya sa mga beneficiaries na tumupad sa kasunduan o obligasyon sa pagbabayad upang mas marami ang makinabang sa nabanggit na proyekto.

Sa mga interesado sa cattle fattening, kailangan lamang makipag-ugnayan sa pangulo ng mga barangay.

• < Prev
• Next >