Batangas City PNP pinarangalan ang mga supporters sa kanilang programa

Details

Wednesday, 30 October 2019 - 4:38:46 PM

Malaking bahagi ng mahusay na pagpapatupad ng mga programa ng Batangas City Police Station ang tulong at suporta ng ilang mga miyembro ng komunidad kung kayat namigay ito ng Certificate of Appreciation bilang pasasalamat at pagkilala sa mga ito.

Ang seremonya ay isinagawa sa Technical Working Group (TWG) at City Advisory Council (CAC) meeting, October 30, sa Sanggunian Session Hall.

Kabilang sa mga binigyang ng certificate of appreciation ay ang Rotary Club Downtown Batangas City na nagbigay ng container van na gagamitin sa pagtatayo ng isang Police Assistance Center (PAC) sa Sitio Ferry Kumintang Ibaba para sa mas mabilis na pagresponde ng kapulisan sa area, at ang Community Based- Support System (CBSS) dahil sa suporta nito sa Operation Section ng City PNP sa pagsasagawa ng checkpoint.

Kasama naman sa mga indibidwal na ginawaran ng sertipiko ng pasasalamat sina Joel Chavez na isang businessman na nagbigay ng computer set para sa San Isidro PAC base; ang media man na si Benedicto Griño; ang mga barangay chairmen ng Cuta, Ramil Caseda at Sta. Rita Karsada, Marciano Ilagan para sa kanilang suporta sa kampanya laban sa iligal na droga; at Donna Valdez, city government employee para sa tulong niya sa pagsasagawa ng License To Own and Possess Firearms (LTOPF) caravan.

Kinilala rin ang malaking suporta ng CAC members sa accomplishments ng City Police Stations kung saan kamakailan lamang ay tumanggap ng award bilang Outstanding City Police Station sa buong lalawigan ng Batangas. Ilan pang provincial and regional awards ang tinanggap ng himpilan dahil sa mahusay na implementasyon ng mga programa ng PNP.

Samantala, nanumpa sa katungkulan ang mga miyembro ng CAC para sa pagpapalawig ng kanilang kooperasyon sa City PNP kasama ang mga bagong miyembro nito na sina Ramon Araneta, vice president for External Affairs and Security, First Gen Clean Energy Complex; Ronald Generoso, administrator, Red Cross Batangas; Jaimelee de Castro, head, news division Brigada News FM; at Pastor Ephraim Camacho, president, Batangas Christian School. (PIO Batangas City)

• < Prev
• Next >