Batangas City Police Station tumanggap ng dalawang awards

  1.jpg 2.jpg 3.jpg 4.jpg 5.jpg

Tumanggap ng Plaque of Recognition bilang 2019 Best City Police Station ang Batangas City at Best Senior Police Commissioned Officer for Administration ang kasalukuyang hepe nito na si PLTCOL Sancho Celedio sa buong probinsya ng Batangas.

Ito ay iginawad ng Batangas Provincial Police Office sa idinaos na 118th Police Service Anniversary celebration, October 14, sa Camp Miguel Malvar.

Sa dalawang magkasunod na taon 2018 at 2019 ay nakuha ng Batangas City Police Station ang pagkilala bilang pinakamahusay na himpilan ng pulisya sa buong lalawigan. Ito ay dahil sa kanilang pagtataguyod ng misyon ng kapulisan na maipatupad ang batas, maiwasan ang kriminalidad at mapanatili ang katahimikan at kaayusan ng lungsod.

Ayon kay Celedio, bumaba ang crime incidents sa taong ito, base sa weekly crime incident reporting at ito ay dahil sa kooperasyon ng mga barangay officials at mga residente. Aniya, kung may mga significant crime incidents kagaya ng homicide ay mataas rin naman ang clearance and solution efficiency rate kung saan na-identified at naaresto ang suspect(s) at nai-file ang kaso sa korte.

Kasama naman sa maigting na kampanya laban sa iligal na droga ng Batangas City PNP ang mga programang magbibigay pagkakataon sa mg surrenderers na makabalik sa komunidad bilang produktibong mamamayan at mabigyan ng hanapbuhay sa tulong ng mga partner agencies. Isa na rito ay ang tanggapan ni Cong. Marvey Mariño na nagbibigay ng libreng skills training katuwang ang TESDA.

Binigyan ng konsiderasyon sa naturang award ang general administration ng himpilan, lahat ng activities ng bawat tanggapan tulad ng traffic, intelligence, investigation, children and women’s desk at iba pa, at ang kanilang epektibo at mabilis na pagresolba ng mga kaso.

Idinagdag rin niya na malaking bahagi ng award na ito ay ang suporta nina Mayor Beverley Dimacuha at Cong. Mariño sa mga programa ng kapulisan.

Ibinahagi ni Celedio ang Best Senior Police Officer award sa kanyang mga kasamahan na laging naka suporta at kaisa sa layuning mapanatili ang katahimikan sa lungsod. “Whatever recognition is given to me, is a collective recognition of how everyone, men and women of the City Police Station has contributed,” sabi niya.

Nagpapasalamat si Celedio na nakita at kinilala ang kanilang pagsisikap. Ito aniya ay magiging inspirasyon nila upang higit na pagbutihin ang kanilang paglilingkod. “Thiis recognition is helping us to give back what is expected of us, what we owe to our partners and prove to ourselves, di man natin kayang mag-isa, we’re being helped. Bonus ang recognition na ito, with or without this we will continue to perform our mandate,” pagtatapos niya. (PIO Batangas City)