Elderly at PWDs dumalo sa emergency preparedness forum

Details

Wednesday, 10 July 2019 - 11:25:00 AM

Nagsagawa ang SM Cares ng SM Foundation ng Emergency Preparedness Forum for Senior Citizens and Persons with Disabilities sa pakikipagtulungan ng Philippine Institute of Volcanology and Seismology (PHIVOLCS) sa SM City Batangas Event Center, July 9, kung saan humigit kumulang sa 200 ang participants.

Ayon kay Juan Marius Cortez, OIC for SM Malls South 4, “ang ating bansa ay saksi sa mga daang emergencies at kalamidad. At kami ay naniniwala na napakahalaga sa bawat isa na maging higit na handa kaysa dati. At pag sinabing bawat isa, ito ay nangangahulugna ng lahat ng miyembro ng ating lipunan kasama ang mga matatanda at mga taong may kapansanan.”

Sinabi naman ni Joan Salcedo, supervising science research specialist ng PHIVOLCS, na napili nila ang mga matatanda at mga may kapansanan sapagkat ang mga ito ang mas nangangailangan ng pag-alalay kapag nag evacuate. Binigyan niya ang mga ito ng mahahalagang impormasyon sa mga maaari at kaya nilang magawa sa panahon ng kalamidad.

“Ang lindol ay parang isang bisitang hindi inaasahan, alam nating darating pero hindi natin alam kung kailan kung kayat dapat lagi tayong handa,” sabi ni Salcedo. Ang earthquake preparedness aniya ay nagsisimula sa pagpili ng lugar na pagtatayuan ng bahay hanggang lumindol kung kayat dapat alam natin ang pwedeng mangyari at pwedeng maging epekto upang naayon ang gagawing paghahanda.

Bukod kay Salcedo, naging resource speaker din si Dr. Ted Esguerra na isang aktibong miyembro ng maraming emergency preparedness and disaster response units sa buong mundo.. Siya rin ay Subject Matter Expert for Radio (DZMM) and TV (ABSCBN) show na RED ALERT na tumalakay sa paksang Robust Preparedness Programs for SM-wide Resiliency Campaign.

Lubos ang pasasalamat ni Ret. Police Chief Inspector Amelia Maderazo na tumatayong Provincial Officer ng Senior Citizens Affairs Office ng lalawigan sa napakaganda aniyang proyektong ito ng SM at Phivolcs. Ibabahagi aniya nila sa iba pa nilang kasamahan ang kanilang mga natutunan kung ano ang mga dapat gawin kapag may lindol at pagkatapos nito. “Ang kaalaman ay isang mahalagang armas upang makaiwas sa sakuna,” sabi niya. (PIO Batangas City)

• < Prev
• Next >