Ilang coastal barangay may best practices sa pangangasiwa ng basura

  1.jpg 10.jpg 2.jpg 3.jpg 4.jpg 5.jpg 6.jpg 7.jpg 8.jpg 9.jpg

Naging positibo ang resulta ng pangalawang bahagi ng monitoring ng KA-BRAD Team Solid Baybay cluster coordinators o composite team ng mga empleyado ng pamahalaang lungsod sa pinalakas na information/education campaign sa waste segregation at plastic ban sa 13 coastal barangay.

Ang naturang kampanya ay bilang pagtalima sa Ecological Solid Waste Management Act of 2000 sa pangangasiwa ng City ENRO at City Solid Waste Management Board.

Sa kanilang paglilibot, nakita ng monitoring team na karamihan sa mga barangay ay naghukay ng compost pit at nagtayo ng mga Materials Recovery Facility o MRF sa bawat sitio habang ang ilang households ay nagtayo nito sa kanilang mga bakuran.

Napag-alaman din nila ang best practices ng ilang mga barangay kung saan nakapagbuo sila ng kanilang epektibong sistema ng pamamahala ng basura.

Sa management plan ng barangay Ambulong, ipinag-uutos ng barangay chairman ang paggawa ng MRF at paghukay ng compost pit sa bakuran ng lahat ng barangay officials at ng kanilang staff sa barangay hall.

Number coding naman sa basurahan ang stratehiya ng barangay Ilijan kung saan merong number bawat basurahan na nakatalaga sa bawat household upang madaling malaman kung sino ang hindi segregated o hindi nakabukod ang basura sa nabubulok at hindi nabubulok.

Sa Pulot Itaas, lahat ng tindahan ay hindi na gumagamit ng plastic bilang pambalot ng paninda kundi fish net, ziplock, microwavable containers at dyaryo. Nagkabit din sila ng mga sako sa tabi ng karsada bilang MRF o basurahan.

Ang ilang barangay naman ay nagtalaga ng isang konsehal at isang tanod bawat sitio upang tingnan kung sumusunod ang mga kabahayan sa mga alituntuning ipinatutupad hinggil sa pangangasiwa ng basura.

Layunin ng Team Solid Baybay Coordinators na umabot sa 80% ng mga households sa bawat barangay ang makasunod sa waste segregation, plastic ban, pagkakaroon ng MRF at compost pit at maabot ang 40% na kabawasan sa hinahakot at itinatapon na basura kumpara noong nagdaang taon.