Relocatees ng barangay Simlong nakinabang sa electrification project ng Meralco Foundation

Details

Friday, 18 May 2018 - 4:25:03 PM

May 67 kabahayan ng Sitio Pook New Village sa Barangay Simlong ang nakinabang sa Relocatees and Informal Settlers Electrification (RAISE) project ng One Meralco Foundation sa pakikipagtulungan at ugnayan ng Meralco Batangas at ng pamahalaang lungsod.

Isinagawa ang lighting ceremony noong May 17 sa basketball court ng barangay Simlong kung saan dumalo sina Mayor Beverley Rose Dimacuha, Congressman Marvey Mariño, Batangas Meralco officials, Pangulong Rudy Mendoza at iba pang barangay officials.

Ayon kay Ms. Corazon Pilapil, manager ng Meralco Batangas Business Center, ang proyektong ito ay “patunay ng maganda, maigting at malalim na samahan ng city government at Meralco na lalong tumibay ng lumagda tayo sa memorandum of understanding noong Abril ng 2017.”

“Kagaya nga ng sinasabi ng ating CEO Manny Pangilinan, ang Meralco ay may mahalagang responsibilidad sa komunidad. Hindi lamang kami supplier o distributor ng kuryente. Nais naming ipakita sa inyo na kami ay handang tumugon at sumuporta sa mga pangangailangan at layunin sa pamamagitan ng pagbibigay ng sapat, ligtas, maaasahan at tapat na paglilingkod. Ang Meralco ay kabahagi ng inyong buhay, kaagapay ng inyong pag-unlad para sa mas maliwanag na bukas.

Binigyang diin naman ni Mayor Dimacuha na sa pamamagitan ng partnership ng pamahalaang lungsod at ng Meralco, palapit ng palapit tayo sa layuning paliwanagin ang mga barangay ng lungsod. “Sana po ay mapasama na ang Isla Verde,” dagdag pa ng Mayor.

Pinasalamatan ni Congressman Mariño ang lahat ng tumulong upang maisakatuparan ang proyektong ito at sinabing ito ay magandang halimbawa ng pagtutulungan. Binanggit din niya ang ibayong kaunlaran na maasahan sa pagdami ng investors sa lungsod at ang dala nitong trabaho at paglago ng ekonomiya lalo na sa implementasyon ng Startoll-Pinamucan diversion road. (PIO Batangas City)

• < Prev
• Next >