Mahihirap na matatanda muling tumanggap ng social pension

  socialpension1.jpg socialpension2.jpg

BATANGAS CITY- May P14 milyon ang ipinamahaging social pension ng Regional Department of Social Welfare and Development sa may 4,921 mahihirap na senior citizens sa Batangas City Sports Coliseum.

Kung dati ay yuong may edad 77 pataas lamang ang sakop ng social pension na ito, pinalawak pa ito ng DSWD upang makasama ang lahat ng senior citizens.

Ang bawat isa ay tumanggap ng P3, 000 para sa pangalawa at ikatlong quarter ng taong kasalukuyan.

Sinabi ni Mila Espanola, hepe ng  CSWDO, na ang mga beneficiaries ay yuong nasa listahan na isinumite nila sa DSWD National Household Targeting System for Poverty Reduction.

Samantala, nakipagugnayan ang DSWD Region sa national level upang humingi ng tulong pinansyal para sa taga Marawi na nakatira na sa ibang lugar. Kaugnay nito isang pamilya mula sa Marawi ang nabigyan ng tulong. Ito ay pamilya ni Noraisah Diamorol, 40 taon gulang at may 2 anak. Ayon sa kanya, dumating sila sa Batangas City at nakitira sa kanilang kamag-anak noong June 19, 2017. Aniya hindi na siya babalik sa Marawi dahil sa nangyaring kaguluhan at wala na rin silang babalikan.

Nagbigay ang DSWD ng P25,000 para sa kanilang pangangailangan, P5,000 para sa educational assistance ng mga anak at P4, 000 para sa food subsidy.Nagbigay din ng dalawang family food packs ang Provincial Social Welfare and Development sa kanila.(PIO Batangas City)