Panawagan ng SP: Huwag magkalat ng maling impormasyon sa social media

Details

Wednesday, 03 May 2017 - 2:47:41 PM

Nanawagan ang mga miyembro ng Sangguniang Panglungsod ng Batangas sa mga mamamayan na maging maingat at responsable sana sa pagpapalabas ng impormasyon partikular sa social media upang hindi magdulot ng pagkalito o masamang epekto sa publiko.

Sa kanyang privilege speech noong May 2, binanggit ni Association of Barangay Council (ABC) President Angelito Dondon Dimacuha ang isang maling impormasyon na ikinakalat sa social media ng mga taong hanggang ngayon ay hindi matanggap ang nagging hatol ng bayan sa kanilang hangaring pulitikal hinggil sa pagpapaayos ng Don Julian Pastor Memorial Market o Bagong Palengke kung saan sinasabi rito na ang P650 million- loan na hinihintay ng city government mula sa Land Bank of the Philippines ay sa nasabing palengke lamang gagamitin.

“Ito ay malaking kasinungalingan sapagkat sa ipinasa nating Annual Investment Program for 2017, P110 million lamang ang kailangan para matapos ang bagong palengke,” sabi ni Dimacuha.

“Nakakabahala po ang mga ganitong paninirang balita, lalo na at nanggagaling itong mga impormasyong ito sa isang dati nating kasamahan dito sa Sanggunian. Paano mangyayari na P650 million ang halaga ng new market, e samantalang noong nakaupo siya sa plenaryong ito, siya ang nag-scrutinized na maige kung saan-saan gagastusin ang P1billion loan na yan? Kaya alam na alam niya na hindi totoo ang mga ikinakalat niyang balita,” dagdag pa ni Dimacuha.

Ayon kay Councilor Nestor “Boy” Dimacuha, “hindi lamang ang ehekutibo ang malalagay in bad light sa usaping ito. Kundi maging ang dignidad ng sangguniang panglungsod, pagiisipan ng masama dahil sa mga lumalabas na maling impormasyon.”

Iminungkahi naman ni Coun. Sergie Rex Atienza na bumuo ng isang fact- finding committee upang maitama at maiwasan ang ganitong disinformation.

“Panahon na para gumawa tayo ng hakbang upang protektahan ang Sangguniang Panglungsod. Ang tagal nating nanahimik at sa pananahimik natin, maraming nabulag dahil sa ikinakalat na malisyosong balita. Hindi ko po alam kung ito ay may kahahantungan pang mas malaking kasinungalingan subalit mas maige po na maging handa tayo, alamin natin kung saan galing ang mga balitang ito at papanagutin sila,” pagtatapos ni Atienza. (PIO Batangas City)

• < Prev
• Next >