State of Calamity ideneklara sa Batangas City

Details

Monday, 10 April 2017 - 4:05:20 PM

Idineklara ng Sangguniang Panlungsod sa special session ngayong araw na ito ang Batangas City sa ilalim ng state of calamity bunga ng pinsala sa mga gusali at imprastrakturang tinamo nito sa lindol mula pa noong April 4 at April 8 sa rekomendasyon ni Mayor Beverley Rose Dimacuha sa pamamagitan ng kanyang Executive Order No. 9 s.2017. Inerekomenda ni Mayor Dimacuha ang state of emergency matapos magsagawa ng damage assessment ang City Engineer’s Office at sa rekomendasyon na rin ng City Disaster Risk Reduction and Management Council(CDRRMC).

Ayon sa kanya, sa ilalim ng state of calamity, madaling maipapagawa ang mga nasirang gusali at imprastraktura sa lungsod.

Nakasaad sa Resolution No. 87 ng konseho: “… there is a pressing need to employ emergency measures to hasten the restoration of affected properties and infrastructure, reinforce the city’s preparedness for a similar calamity and aid the constituents to return to normal living”.

Samantala, nagsagawa kahapon ng inspection ang City Engineer’s Office at mga private engineers na nag volunteer ng kanilang serbisyo sa pakikipag-ugnayan ni Congressman Marvey Marino sa mga gusali sa City Hall upang maseguro ang kaligtasan dito.

Kaninang umaga ay pansamantala munang hindi pinagamit ang mga opisina sa second floor ng main building kasama na ang Office of the Mayor upang maseguro ng CEO ang integridad ng gusali. Nitong hapon ay nakabalik na ang mga nag-oopisina rito.

Sa kabuuan ay ligtas naman ang City Hall maliban sa mga major damages sa General Services Department na ngayon ay pansamantalang nag-oopisina sa Sports Coliseum at ang City Assessor’s Office na nagbababa na ng gamit upang lumipat sa ibang gusali kung kayat hindi muna sila nakapagbukas ng opisina ngayong araw na ito.

Kaninang umaga, nagdaos ng pagpupulong sina Congressman Marino at Mayor Dimacuha sa mga department heads kung saan binigyan sila ng briefing ng assessment ng kanilang mga opisina.

Nakipagpulong din sila sa mga barangay captains kasama si ABC President Dondon Dimacuha upang pagsumitihin ang mga ito ng damage assessment sa kanilang barangay.

Naiparating din ng mga pangulo ang kanilang mga naging problema noong lindol at ang kanilang mga suhestiyon upang mapaayos ang kanilang kahandaan sa kalamidad.

Samantala, wala pa ring klase sa mga pampubliko at pribadong paaralan sa Batangas City mula April 11-12. (PIO BATANGAS CITY)

• < Prev
• Next >