Gagawing By-pass road magdudulot ng paglago ng ekonomiya

Details

Thursday, 06 April 2017 - 2:55:57 PM

Maaaring maging bagong growth area ng Batangas City ang mga lugar na dadaanan ng Star Tollway to Pinamucan Ibaba By-Pass Road Project.

Ito ang sinabi ni 5th District Congressman Marvey Marino sa mga dumalong barangay captains, non-government organizations at department heads sa City Development Council Full Council Meeting na ginanap kaninang umaga sa Teacher’s Conference Center.

Ayon kay Marino, tuloy na tuloy na ang naturang proyekto sa pakikipagtulungan ng city government at ng Department of Public Works and Highways (DPWH).

Aniya, sinagot na ng pamahalaang lungsod ang pagbili ng right of way upang mapabilis ang pagpapagawa nito. Bunga nito, maaari aniya siyang humingi ng mas malaking budget sa national government “para naman sa concreting ng karsada upang masiguro na matibay at maayos ang pagkakagawa ng by-pass road,” dagdag ni Marino.

“Malaki ang magiging epekto nito sa ekonomiya sa lungsod. Biruin nyo lahat ng mga nasa parte ng solid east hindi na dadaan sa lumang highway. Luluwag ang traffic na matagal nang idinadaing nating lahat. Malamang maraming investors ang sumugal sa mga areas na dadaanan ng by-pass road,” ani Marino.

Ayon naman kay City Planning and Development Officer Engr. Sonny Godoy, tapos na ang parcellary survey ng nasabing proyekto.

“Bukod sa right of way acquisition, kasama sa Phase 1 ang pagbubutas ng karsada mula sa Barangay Tinga Itaas, tatawid ng Calumpang River papuntang San Pedro, Dalig, Dumantay, Sampaga, Dumuclay, Sirang Lupa at lalabas sa Libjo. Ito ay may haba na 10.3 kilometers. Ang phase 2 naman ay mula sa Sirang Lupa, San Isidro, Mahabang Dahilig, Tabangao Ambulong, Tabangao Dao, Pinamucan Proper hanggang Pinamucan Ibaba. Ito ay may habang 8.4 kilometers,” ani Godoy.

Kapag naayos na ang right of way acquisition, ang Startollway to Pinamucan Ibaba By-Pass Road Project ay agad na sisimulan at inaasahang makukumpleto sa loob ng 2 taon. (PIO Batangas City)

• < Prev
• Next >